https://innews.az/uploads/news/2023-09/_innews_b0ae47353a841fe222a5ce78a_o.jpg
Azərbaycan səfiri Latın Amerikası və Karib Hövzəsi üzrə Beynəlxalq Məskunlaşma Sammitində “Böyük Qayıdış” siyasəti və genişmiqyaslı bərpa-quruculuq işlərindən bəhs edib
Cari ilin 28-30 avqust tarixlərində Meksikanın Qvadalaxara şəhərində Latın Amerikası və Karib Hövzəsi üzrə Beynəlxalq Məskunlaşma Sammiti keçirilib. Ölkəmizin Meksikadakı səfiri Məmməd Talıbov Sammit çərçivəsində “BMT-nin 2030 Gündəliyinin və Dayanıqlı İnkişaf Məqsədlərinin, Məskunlaşma Proqramının (UN-Habitat) Yeni Şəhər Gündəliyinin icrası” mövzusunda təşkil olunmuş paneldə çıxış edib.
Səfir M.Talıbov çıxışı zamanı Dayanıqlı İnkişaf Məqsədləri və Yeni Şəhər Gündəliyinin icrasına nail olunmasının vacibliyini vurğulayıb, ölkəmizin UN-Habitat-ın fəaliyyətinə yüksək qiymət verərək təşkil etdiyi tədbirlərdə yaxından iştirak etdiyini diqqətə çatdırılıb. Azərbaycanın UN-Habitat-ın ən fəal dəstəkçisi və donorlarından biri olduğunu qeyd edən diplomat ölkəmizlə UN-Habitat-ın birgə təşkilatçılığı ilə baş tutmuş və planlaşdırılan tədbirlərin əhəmiyyətindən bəhs edib.
Həmçinin, 2022-ci ildə Azərbaycanda qəbul edilən iki mühüm siyasi sənədin - “Azərbaycan Respublikasının 2022-2026-cı illərdə sosial-iqtisadi inkişaf Strategiyası” və “Azərbaycan Respublikasının işğaldan azad edilən ərazilərinə Böyük Qayıdışa dair I Dövlət Proqramı” - BMT-nin 2030 Gündəliyinin və Dayanıqlı İnkişaf Məqsədlərinin, eləcə də sosial-iqtisadi inkişafa dair milli prioritetlərin həyata keçirilməsinə xidmət etdiyi qeyd olunmuşdur. Ölkəmizin bir çox DİM üzrə irəliləyiş əldə etdiyi və “Dayanıqlı inkişaf-2022” hesabatında ölkələr sıralamasında öz mövqeyini daha da yaxşılaşdırdığı tədbir iştirakçılarının diqqətinə çatdırılıb.
Səfir M. Talıbov 2020-ci ildə torpaqlarımız işğaldan azad edildikdən sonra “ağıllı şəhərlər”, “ağıllı kəndlər” konsepsiyası əsasında bu ərazilərdə həyata keçirilən genişmiqyaslı bərpa-quruculuq işləri, yüz minlərlə azərbaycanlının öz doğma torpaqlarına təhlükəsiz və ləyaqətlə qayıdışının təmin edilməsi barədə ətraflı məlumat verib. Ermənistanın bu ərazilərdə törətdiyi vandalizm əməllərinin və mina terrorunun yaratdığı çətinliklərə baxmayaraq, “Böyük Qayıdış”la birlikdə azad edilən torpaqlara həyat qayıtdığı bildirib, qısa müddət ərzində reallaşdırılan iri enerji-nəqliyyat və yaşayış layihələri haqqında məlumatla cıxış edilib.
Qeyd olunmuşdur ki, Azərbaycan postpandemiya və postmünaqişə reallıqlarına uyğun olaraq bütün region üçün yeni iqtisadi perspektivlər üzrə UN-Habitat və digər beynəlxalq tərəfdaşlarla sıx əməkdaşlığa hazırdır.
