https://innews.az/uploads/news/2026-01/_innews_3a13988212be44d9cbdc8500c_o.jpg
Arzu İsayevanın “Telejurnalistika və data analiz” adlı dərs vəsaiti müasir jurnalistikanın ən aktual istiqamətlərindən biri olan data əsaslı xəbər istehsalına sistemli və elmi yanaşma təqdim edir. Azərbaycanda radionun müntəzəm yayıma başlamasının 100, televiziya yayımının isə 70 illik yubileyinə həsr olunmuş bu nəşr milli audiovizual medianın tarixi inkişaf mərhələləri ilə rəqəmsal transformasiya prosesləri arasında məntiqi körpü yaradır.
Müəllif giriş hissəsində data telejurnalistikasının jurnalistikanın mahiyyətini necə təsir etdiyini əsaslandırır və sadəcə köməkçi element deyil, xəbərin keyfiyyətini, etibarlılığını və ictimai dəyərini müəyyən edən strateji resurs olduğunu elmi arqumentlərlə izah edir. Xüsusilə CAR (Computer-Assisted Reporting) yanaşmasına istinad edilməsi və onun telejurnalistikada tətbiq imkanlarının göstərilməsi kitabın metodoloji əhəmiyyətini artırır.
Dərs vəsaitinin əsas üstünlüklərindən biri mövzuların mərhələli və məntiqi ardıcıllıqla təqdim olunmasıdır. Dataya əsaslanan jurnalistikanın nəzəri çərçivəsi ilə yanaşı, məlumatın toplanması, təhlili, təmizlənməsi, vizuallaşdırılması və auditoriyaya çatdırılması kimi praktik mərhələlər konkret nümunələrlə izah olunur. Böyük data anlayışı, “5V modeli”, eləcə də televiziya xəbər proqramlarında datadan istifadə kitabı müasir media mühitinin real tələbləri ilə uzlaşdırır.
Kitabda etik məsuliyyət, dəqiqlik, şəffaflıq və istinad mədəniyyəti kimi jurnalistikanın fundamental prinsipləri data əsaslı yanaşma kontekstində yenidən dəyərləndirilir. Bu yanaşma kitabı təkcə texniki vəsait deyil, eyni zamanda analitik düşüncəyə malik peşəkar jurnalist modelinin formalaşmasına xidmət edən elmi mənbəyə çevirir.
“Telejurnalistika və data analiz” dərs vəsaiti jurnalistika tələbələri, televiziya və radio jurnalistləri, eləcə də data jurnalistikasına maraq göstərən tədqiqatçılar üçün aktual və dəyərli bir mənbədir. Milli radio və televiziya tariximizin əlamətdar yubileyləri fonunda nəşr olunması isə bu əsərə həm simvolik, həm də elmi baxımdan xüsusi məna qazandırır.
