https://innews.az/uploads/news/2026-02/_innews_69cfe76fbf53a155c44e2e672_o.jpg
4 fevral 2026-cı il tarixində Əbu-Dabidə keçirilən “Zayed İnsan Qardaşlığı Mükafatı”nın təqdimolunma mərasimində çıxış edən Azərbaycan Respublikasının Prezidenti cənab İlham Əliyev regionda sülhün və qarşılıqlı etimadın bərqərar olunması istiqamətində ölkəmizin atdığı real və prinsipial addımları beynəlxalq ictimaiyyətin diqqətinə çatdırmışdır.
Dövlətimizin başçısı çıxışında Azərbaycan ilə Ermənistan arasında münasibətlərin normallaşdırılması prosesində ölkəmizin humanist və konstruktiv mövqeyini konkret faktlarla ifadə edərək bildirmişdir:
“Biz təkcə Azərbaycan ərazisindən Ermənistana yük daşımalarına qoyulmuş məhdudiyyətləri aradan qaldırmadıq, eyni zamanda, Ermənistana neft məhsullarının ixracına da başladıq.”
Bu fikirlər Azərbaycanın sülhə verdiyi töhfənin yalnız siyasi bəyanatlarla deyil, praktiki və iqtisadi addımlarla müşayiət olunduğunu aydın şəkildə nümayiş etdirir. Postmünaqişə dövründə qarşı tərəfə qarşı bu cür humanitar və iqtisadi yanaşma regionda etimadın möhkəmləndirilməsinə, qarşılıqlı asılılığın və əməkdaşlığın formalaşmasına xidmət edir.
Prezident İlham Əliyevin vurğuladığı kimi, Azərbaycanın məqsədi regionda davamlı sülhün təmin olunması, düşmənçilik səhifəsinin bağlanması və Cənubi Qafqazın sabit, təhlükəsiz əməkdaşlıq məkanına çevrilməsidir. Yük daşımalarına qoyulan məhdudiyyətlərin aradan qaldırılması və neft məhsullarının ixracına başlanılması bu siyasətin bariz nümunəsi olmaqla yanaşı, beynəlxalq hüquqa və humanist dəyərlərə əsaslanan məsuliyyətli dövlət mövqeyini əks etdirir.
“Zayed İnsan Qardaşlığı Mükafatı” kimi nüfuzlu beynəlxalq platformada səsləndirilən bu mesajlar bir daha təsdiqləyir ki, Azərbaycan sülhün bərqərar olunmasında təşəbbüskar tərəfdir və qarşılıqlı etimadın yaradılması üçün real addımlar atmaqdan çəkinmir. Prezident İlham Əliyevin çıxışı Azərbaycanın yalnız regional deyil, eyni zamanda qlobal sülh və insan qardaşlığı ideallarına verdiyi töhfənin yüksək dəyərləndirilməsinin göstəricisi olmuşdur.
YAP Şirvan şəhər təşkilatının məsləhətçisi
İsrayılov Amil Faiq oğlu
