https://innews.az/uploads/news/2023-02/_innews_e523e039cd8884944ae8a97d2_o.jpg
24 fevral 2023-cü il tarixində Beynəlxalq Türk Akademiyası Azərbaycan Respublikasının Astanadakı səfirliyi ilə birgə Xocalı soyqırımının 31-ci ildönümünə həsr olunmuş tədbir keçirib.
Beynəlxalq Türk Akademiyasının ev sahibliyi etdiyi anım tədbirində Akademiyanın prezidenti, akademik Şahin Mustafayev, Azərbaycan Respublikasının Astanadakı səfiri Ağalar Atamoğlanov, Azərbaycan diasporunun nümayəndələri, səfirliyin və Akademiyanın üzvləri iştirak ediblər.
Tədbir çərçivəsində Xocalı faciəsinə dair fotoşəkillərdən ibarət sərgi nümayiş etdirilib.
Anım tədbiri qətliamda həyatını itirən həmvətənlərimizin xatirəsinin bir dəqiqəlik sükutla yad edilməsi ilə başlayıb.
Akademik Şahin Mustafayev çıxışında Ermənistan silahlı qüvvələri tərəfindən Xocalı soyqırımı zamanı baş vermiş faciəli hadisələr haqqında məlumat verib. Xocalı soyqırımının təkcə Azərbaycanın deyil, bütün bəşəriyyətin faciəsi olduğunu bildirən akademik qeyd edib ki, günahsız insanların hansı ölkədə olmasından asılı olmayaraq həyatlarını itirməsi böyük fəlakətdir.
“Əminəm ki, beynəlxalq ictimaiyyət dünyanın heç bir ölkəsində günahsız insanlara qarşı bu kimi dəhşətli cinayətlərin törədilməməsi üçün Xocalıda baş verən qanlı hadisələrlə bağlı ədalətli qərar qəbul edəcək. Ümid edirəm ki, bəşəriyyət tarixində belə bir faciəvi hadisə bir daha təkrarlanmayacaq”, - deyə Şahin Mustafayev bildirib.
