Xocalı qurbanlarının xatirəsi Polşanın müxtəlif şəhərlərində yad edilib

Xocalı qurbanlarının xatirəsi Polşanın müxtəlif şəhərlərində yad edilib Xocalı qurbanlarının xatirəsi Polşanın müxtəlif şəhərlərində yad edilib https://innews.az/az/news/id-10429

Azərbaycanın Polşadakı Səfirliyi tərəfindən Varşavanın Qan Donor Mərkəzində Xocalı soyqırımı qurbanlarının xatirəsinə həsr olunmuş qanvermə aksiyasına dəstək göstərilmişdir.  Qanvermə aksiyasında Xocalı soyqırımı barədə məlumatları özündə əks etdirən bannerlər quraşdırılmış, faciə ilə bağlı broşür və kitabçalar qan verməyə gələn insanlar arasında paylanmışdır.

Səfirlik tərəfindən eyni zamanda Polşa Qızıl Xaç Cəmiyyəti ilə birgə Xocalı soyqırımı qurbanlarının xatirəsinin yad edilməsi çərçivəsində Plotsk şəhərində ”Promyczek” Ətraf Mühitin Mühafizəsi Klubunda müvəqqəti yerləşdirilmiş Ukraynadan olan uşaqlar üçün Azərbaycan mətbəxindən şirniyyat nümunələri və meyvə şirələri, habelə məktəb ləvazimatları və uşaqların asudə zamanlarını səmərəli keçirmələri üçün müxtəlif oyuncaqlar və digər hədiyyələr ianə edilmişdir.

Daha sonra Polşa Qızıl Xaç Cəmiyyətinin İdarə Heyətinin üzvü, Polşa Qızıl Xaç Cəmiyyətinin Plotsk bölməsinin rəhbəri və Plotsk Şəhər Şurasının Səhiyyə və sosial məsələlər departamentinin direktoru ilə keçirilmiş görüşdə səfir N.Qurbanova Xocalı soyqırımı barədə qısa məlumat verərək hər il 26 fevral tarixində ölkəmizdə Xocalı qurbanlarının xatirəsinin yad edildiyini, Xocalı soyqırımı zamanı 63-ü uşaq olmaqla 613 nəfərin qətlə yetirildiyini qeyd etmişdir.

Xocalı soyqırımı Azərbaycan tarixinə ən dəhşətli və faciəli səhifələrdən biri kimi daxil olduğunu vurğulayan səfir 1992-ci il fevralın 25-dən 26-na keçən gecə Ermənistan silahlı qüvvələri keçmiş SSRİ-nin Xankəndidə yerləşən 366-cı motoatıcı alayının şəxsi heyətinin və texnikasının bilavasitə iştirakı ilə Xocalı şəhərini zəbt edərək, Azərbaycan xalqına qarşı soyqırımı həyata keçirildiyini bildirmişdir. Səfir əlavə etmişdir ki, Azərbaycan xalqı qisas istəmir, ədalət tələb edir, soyqırımı törədənlərin cinayət qarşısında cavab verməsini tələb edir.

Sonda səfir N.Qurbanovaya uşaqlar tərəfindən çəkilmiş rəsmlər hədiyyə edilmişdir.

Tədbir Plotsk şəhərinin mətbuatında işıqlandırılmışdır.