https://innews.az/uploads/news/2023-03/_innews_64fe24b9a1a72cb65c60a70f6_o.jpg
Mərkəzi Gömrük Hospitalının uşaq cərrahı Toğrul Piriyev “Həkim məsləhəti” rubrikasında “Uşaqlarda qasıq yırtığının səbəbləri nədir?” mövzusunda məlumat verib.
Uşaq cərrahiyyəsində yırtığın ən çox rast gəlinən forması qasıq yırtığıdır. Usaqlarda qasıq yırtığı anadangəlmə peritonun qasıq kanalına uzanan çıxıntısının açıq qalması ilə qarındaxili orqanların kanala daxil olması nəticəsində əmələ gəlir.
Statistik məlumatlara görə 100 yenidoğulmuş uşaqdan orta hesabla ikisində qasıq yırtığına rast gəlinir. Vaxtından əvvəl və normadan aşağı bədən çəkisi ilə doğulmuş uşaqlarda bu göstərici 30%-ə qədər yüksəlir. Sağ tərəfli qasıq yırtığına daha çox (60%) rast gəlinir. Sol tərəfli yırtıqlara 25-30%, iki tərəfli qasıq yırtıqlarına isə orta hesabla 10% civarında rast gəlmək olur. Statistik olaraq oğlanlarda bu xəstəlik qızlara nisbətən daha çox müşahidə olunur.
Qasıq yırtığı uşaqlarda qasıq bölgəsində gözlə görünən şişkinliklə gəlir. Şişkinlik ən çox ağlama, gücənmə, asqırma və öskürmə hallarında qarındaxili təzyiqin artması nəticəsində əmələ gəlir. Şişkinlik uşaq sakit olduğu və ya yatdığı halda itir.
Diaqnoz qoyulduqdan sonra ən qısa zamanda (uşağın bilinən və öncədən mualicəsi zəruri olan hər hansı başqa bir xəstəliyi yoxdursa) planlı surətdə əməliyyat olunmalıdır. Mualicə olunmayan qasıq yırtığı həyat üçün risk yaratmaqla, orqan itkisinə gətirib çıxara bilər. Ağırlaşma zamanı orqanlar yırtıq kisəsi içərisində boğula bilər. Boğulmuş qasıq yırtığı 60-70 % hallarda 2 yaşa qədər uşaqlarda müşahidə olunur. Boğulma riski ilə əlaqədar olaraq xəstənin səhhəti imkan verən ən yaxın zamanda planlı qaydada əməliyyat edilməlidir.
Uşaq yaxın saatlar (2-3 saat) içərisində əməliyyat olunmazsa, yırtıq kisəsi içərisində olan orqanların (bağırsaq ilgəklərinin, oğlanlarda xayaların, qızlarda yumurtalıqların) çürüməsinə səbəb ola bilər. Normal halda 30-40 dəqiqə ərzində başa çatan əməliyyat uşağı ölüm riskindən qurtarır.
