https://innews.az/uploads/news/2023-03/_innews_384b3e71d7d0dd3ea7afbfb6a_o.jpg
Zaman ötür, düşüncələr dəyişir, maraqlar həyatla bərabər yenilənir. Fəqət hər zamanın sirli və kəşf edilməyən mövzusu eyni olaraq qalır – Qadın.
Dünya içrə söz dünyası olan nəhəng ədəbiyyat adamı, qələmilə qadın dünyasını çözə bilməyən Tolstoyun dediyi kimi: "Qadın elə bir mövzudur ki, onu nə qədər müzakirə etsən də həmişə yenidir".
Məqaləyə "Qadın kimdir?" "Qadın azaddırmı?" və beynimizdə var-gəl edən bir çox sualları həm özümə, həm də əziz oxuculara ünvanlayaraq, illərlə aktual olan suallara elə yazı əsnasında cavab tapmağa çalışaraq başladım.
Qadının kəşf edilməsini sonu bəlli olmayan ümmana bənzədərdim.
Qadın anadır. Şəfqətinin sonsuzluğu ilə dünyanı bəzəyən, bir ömür yorulmadan yol getməyə hazır olan şəxsdir. Hələ klassiklərimizin dövründən ta üzü bugünə qədər qadın azadlığı əsas mövzu olub. Şəxsi mövqeyimə əsaslansam mən qadının azadlığını təhsil almasında, ayaqları üzərində möhkəm dura bilməsində, mənəvi ucalığında, fikrini azad ifadə edə bilməsində, doğru seçimində, hüquqlarını müdafiə edə bilməsində görürəm.
Bu həyat çərçivəni çox sevir. Sevgi, azadlıq, hörmət, inam, etibar çərçivəsində olanda daha gözəl olur. Fikrimi Abbasqulu ağa Bakıxanovun "Azadlıq ifrat dərəcəsinə çatanda özbaşınalığa çevrilir" sözləri ilə ifadə etmək istəyirəm.
Qadın azadlığı ilə bağlı fərqli fikirlər var. Bütün bunlar insanların yaşadığı mühitlə, dinlə, şəxsi düşüncələrilə bağlıdır.
Təssüf ki, bu gün qadın azadlığına dünya pəncərəsindən baxanda bir çox həlli tapılmayan problemlərlə qarşılaşırsan. Bir çox ölkələrin qanununda qadın hüquqları fərqli tənzimlənir.
İki ilə yaxın ömür yaşayan Azərbaycan Xalq Cümhuriyyəti dövründə qadınlara çoxsaylı hüquqlar verilmişdir.
Azərbaycan ikinci dəfə müstəqillik əldə etdikdən sonra Ümummilli Lider Heydər Əliyev qadınların hüquqlarının qorunması üçün tarixi addımlar atdı. Prezident Heydər Əliyev qadınların cəmiyyətdəki rolunu yüksək qiymətləndirərək deyirdi: "Cəmiyyətdə qadınların üzərinə daim çox böyük vəzifələr düşür, onların işi həmişə ağırdır. Ancaq onlar bu vəzifələri şərəflə yerinə yetirir və həmişə olduğu kimi indi də cəmiyyətdə aparıcı rol oynayırlar”.
Bugün də ölkəmizdə qadın hüquqlarına xüsusi önəm verilir. Məhz illərdi 8 Mart Beynəlxalq Qadınlar Günü kimi qeyd edilən bayram onların öz hüquqları uğurunda mübarizə aparıb qələbə qazanmasının göstəricisidir. Bugünün tarixini belə ifadə etmək olar və düşünürəm ki, tam doğru yanaşmadır: "Qadın istərsə, məqsədi uğurda mübarizə aparsa qalib olar".
Bu bayram illərdir ki, ölkəmizdə də qeyd olunur və həmin gün qeyri-iş günü sayılır.
Qadın bir gün deyil, hər gün özəl və gözəl olmalıdır. Qadını güldürmək, xoşbəxt etmək üçün hörmət, sevgi, dəyər lazımdır...
“Qadın gülərsə, bu ıssız mühitimiz güləcək,
Sürüklənən bəşəriyyət qadınla yüksələcək"
– deyən şairimiz Hüseyn Cavidin ideyaları, sətirləri düşünürəm ki, bir himnə çevrilib... Şairin də dediyi kimi, qadın sevinsin, gülsün. Mutlu olsun ki, dünya da xoşbəxt olsun.
Dəyərli,əziz qadınlar, üzümü sizə tuturam: "Hər zaman dəyərli olun" – deyirəm.
Bayramınız mübarək...
Asiman Hafizqızı, BDU-nun Jurnalistika fakültəsinin tələbəsi
Ən son xəbərləri səhifəmizdən də izləyin
