Bakıda V Beynəlxalq Türk Dünyası Dağınıq Skleroz Konqresi keçirilib

Türk Dünyası MS Araşdırmalarına Dəstək Dərnəyi, Nevroloqların Milli Assosiasiyası və Azərbaycan Uşaq Nevroloqları Assosiasiyasının birgə təşkilatçılığı ilə Bakıda V Beynəlxalq Türk Dünyası Dağınıq Skleroz Konqresi keçirilib.

Tədbirin açılışında səhiyyə nazirinin müavini Nadir Zeynalov, Nevroloqların Milli Assosiasiyasının prezidenti Rəna Şirəliyeva, Səhiyyə Nazirliyi Əziz Əliyev adına Azərbaycan Dövlət Həkimləri Təkmilləşdirmə İnstitutunun (ADHTİ) rektoru Nazim Qasımov, Azərbaycan Uşaq Nevroloqları Assosiasiyasının prezidenti Aytən Məmmədbəylİ, Gülhanə Təhsil və Tədqiqat xəstəxanasının professoru Şeref Demirkaya, Kocaeli Universiteti Araşdırma və Tətbiq Xəstəxanasının professoru Hüsnü Efendi və digərləri çıxış ediblər.

Beynəlxalq konqresə Azərbaycan, Türkiyə, Özbəkistan, Qazaxıstan, Tacikistan, Qırğızıstandan canlı və onlayn formatda 300-dək iştirakçı qatılıb.

Tədbir Azərbaycan Respublikası Səhiyyə Nazirliyinin Davamlı Tibbi Təhsil üzrə akkreditasiya olunub və 17 DTT kredit balı ilə qiymətləndirilib.