https://innews.az/uploads/news/2023-07/_innews_4e76cc1cc2ab991b3d49b7d9d_o.jpg
Nəhayət, uzun illər sonra müzəffər ordumuzun düşməndən azad etdiyi qədim Azərbaycan torpağını - Şuşanı görmək mənə də nəsib oldu.
Ermənistanın kapitulyasiyasının təsdiqi olan 10 noyabr 2020-ci il tarixli üçtərəfli Bəyanatın imzalanmasından artıq 3 il ötür. 30 illik işğalı 44 günə həll edən Ali Baş Komandan və Azərbaycan əsgərinin əsəridir bugünkü Şuşa.
Təhsilim, iş və siyasi fəaliyyətimlə bağlı çox ölkə və şəhərlərdə yaşamışam, lakin indi gördüyüm Şuşa qədər məni cəlb edən yer olmayıb. Ola bilər ki, o bizə tarixən daha əziz və doğmadır. Bu doğmalıq isə hər bir azərbaycanlının qanında var. Millətin ruhu, ab-havasıdır həm də Şuşanı bu qədər sehrli edən.
Bu səfər, müharibədən sonra mənim ikinci səfərimdir. Birinci, məlumunuz idi, xüsusi nümayəndələrlə baş tutmuşdu. Həmin dövrlərdə, erməni vandalizmini dünyaya car çəkmək üçün, dünya mediası nümayəndələrinə əyani göstərmək üçün ilk addımlar atılırdı.
Ötən günlərdə “4-cü Sənaye İnqilabı dövründə Yeni Media” mövzusunda Şuşa Qlobal Media Forumu”nun açılış mərasimində çıxış edən Cənab prezident İlham Əliyevin sözlərini təkrar etmək istəyirəm – Bu gün, biz yenə də öz həqiqətlərimizi sübut etməyə məhkumuq. Ədalətin bərqərar olmasına baxmayaraq, haqlı qələbəmizə baxmayaraq. Demək ki, mübarizəmiz hələ davam edir, demək ki, regionda öz sözünü deyə bilmək üçün göstərilən səy və cəhdlər bir istiqamətdə aparılmamalı, bu missiyada birlik, həmrəylik və vahid istiqamət əsas götürülməlidir.
Yol boyu izlədiyim o oldu ki, yenidənqurma işləri surətlə davam edir, 7-8 ay bundan öncəki hüznü ifadə edən və ürək ağrıdan dağıntılardan əsər-əlamət yoxdur. Artıq demək olar ki, bir oyanış baş verib.
Qısa zaman ərzində bu torpaqlarda həyata keçirilən genişmiqyaslı quruculuq işləri Azərbaycanın həm iqtisadi, həm də siyasi qüdrətini bir daha sübut edir.
Onu da qeyd edə bilərəm ki, Şuşanın bərpa prosesi əsaslı və planlı şəkildə aparılır. Pənahəli xanın şəhəri öz irsinə sadiq yenilənəcək.
Qədim mədəniyyət paytaxtı sayılan Şuşa, Cənab Prezident tərəfindən yenidən 2023-cü il üçün “Türk dünyasının mədəniyyət paytaxtı” elan edildi. Başdan ayağa şərqi, müsəlmanlığın tarixi köklərini özündə ehtiva edən Şuşanı, islamafob ermənilər, həmçinin ona havadar ölkələr Ermənistana aid şəhər kimi təqdim etmələri nə qədər gülünc və məntiqsiz idi.
Şuşanın xarici aləmdə əlaqəsini təmin etmək üçün Pənahəli xanın hakimiyyəti dövründə tikilən dörd qala qapısı - Bu qapılardan üçünün - Gəncə, Ağaoğlan və İrəvan qapılarının adları dövrümüzə qədər gəlib, lakin, mənbələrdən öyrəndiyimiz qədər dördüncü qapının isə nə adı, nə də yeri hələ də müəyyənləşdirilməyib.
“Böyük Qayıdış" siyasətinin tərkib hissələrindən biri də, bu gün Şuşaya səfərlərin təşkil olunmasıdır.
Mədəniyyət paytaxtına təhlükəsiz turizm səfərləri, habelə işğaldan azad olunmuş ərazilərdə iqtisadi dirçəlişi yüksəltməyi hədəf alaraq, ilk şəhid abidəsinin ziyarəti, Cıdır düzü, “Vaqif” məqbərəsi, Mehmandarovların evi, Bülbülün ev muzeyi, “Yuxarı Gövhər Ağa” məscidi, “Güllələnmiş Heykəllər” meydançası, Şuşa qalası, Şuşanın “Gəncə” qapıları və “Xarı Bülbül” simvolu, “Qazançı” Kilsəsi, Şuşa “Realnıy” Məktəbi kimi tarixi abidələrlə tanış olan hər kəs, bunları öz gözləri ilə gördükdən sonra mütləq təfərrüat və öz təəssüratlarını qataraq paylaşmalıdır.
Qoy dünya da görsün ki, “Şuşa Azərbaycanın gözüdür, iftixar nöqtəsidir, mədəniyyətimizin rəmzidir”! deyəndə dahi liderimiz necə gözəl və füsunkar təbiəti əsas gətirib deyirmiş.
Pənahəli xanın qalasını, Azərbaycanın incəsənət beşiyini, millətin tarixini, qürurunu özünə qaytaran hər bir şəhid qarşısında baş əyirəm, Vətən uğrunda sağlığını fəda edən qazilərimizə şəfa diləyirəm.
Qarabağ Azərbaycandır!
Şuşa Azərbaycandır!
Ən son xəbərləri səhifəmizdən də izləyin
