https://innews.az/uploads/news/2023-09/_innews_f2b2c5182660db5ab8ff9b208_o.jpg
Niderland Krallığında fəaliyyət göstərən “Azərbaycan Xanımlar Klubu” (Azerbaijan Ladies Club) ölkəmizin Qarabağ iqtisadi rayonunda Ermənistan silahlı qüvvələri tərəfindən bir sıra genişmiqyaslı hərbi təxribatlar və terror hücumları törədilməsini kəskin şəkildə pisləyib.
“Azərbaycan Xanımlar Klubu” adından dünya ictimaiyyətinə ünvanlanan bəyanatda bildirilib ki, Rusiya sülhməramlılarının müvəqqəti nəzarətində olan Xocavənd rayonu ərazisində törədilmiş təxribat və terror faktı Ermənistanın sülh prosesində maraqlı olmadığını bir daha sübut edir.
2020-ci ildə baş vermiş 44 günlük Vətən müharibəsindən indiyə qədər ümumilikdə mina qurbanlarının sayının 314 nəfərə çatdığı, onlardan 67 nəfərinin həlak olduğu diqqətə çatdırılıb.
Ermənistanın işğal illərində basdırdığı minaların dəqiq xəritələrini indiyədək ölkəmizə vermədiyi, üstəlik, post-müharibə dövründə Azərbaycanın azad edilmiş ərazilərində yenidən minalar basdırmaqla təxribatlarını davam etdirdiyi bir daha vurğulanıb. Bildirilib ki, bu təcavüzkar ölkənin 10 noyabr 2020-ci il tarixli Üçtərəfli Bəyanata və beynəlxalq hüquqa zidd davranışı Azərbaycanın mülki vətəndaşlarının və hərbi qulluqçularının həyatını təhlükə altına atır.
“Azərbaycan Xanımlar Klubu” dünya ictimaiyyətini və beynəlxalq təşkilatları günahsız insanların ölümünə səbəb olan və bölgədə sülh quruculuğu prosesinə zərər verən bu təxribatı qətiyyətlə pisləməyə, silahlı qüvvələrini Azərbaycanın Qarabağ bölgəsindən birdəfəlik çıxarması, dəqiq mina xəritələrini təqdim etməsi və sülh müqaviləsini imzalaması üçün Ermənistana güclü təzyiq göstərməyə çağırıb.
Ən son xəbərləri səhifəmizdən də izləyin
