https://innews.az/uploads/news/2023-10/_innews_084a3f46561d25d4f875b59b5_o.jpg
1 oktyabr tarixində Azərbaycanın Polşadakı Səfirliyinin təşəbbüsü və Azərbaycan Respublikası Mədəniyyət Nazirliyinin dəstəyi ilə Polşanın Bıdqoşç şəhərində keçirilən Beynəlxalq Musiqi Festivalı çərçivəsində Azərbaycan musiqisi gecəsi təşkil edilmişdir.
Gecədə gənc ifaçılar Nisbət Sədrayeva və Hüseyn Məlikov tanınmış musiqiçilər – Rövşən Qurbanov, Toğrul Əsədullayev, Vüsal Bayramov və Rafael İsgəndərovun müşayiəti ilə muğamlarımızdan nümunələr, xalq mahnıları və görkəmli bəstəkarlarımızın əsərlərindən parçalar səsləndirmişlər.
Gecənin açılışında Azərbaycanın Polşadakı səfiri Nərgiz Qurbanova və konsertin təşkil olunduğu Pomeraniya Filarmoniyasının direktorunun müavini Tsezari Nelkovski çıxış etmişlər.
Gecədə çıxış edən səfir N.Qurbanova, ilk növbədə, gecənin təşkilində göstərdikləri dəstəyə görə Azərbaycan Respublikası Mədəniyyət Nazirliyi və Pomeraniya Filarmoniyasına təşəkkürünü ifadə etmişdir. O, cari ilin bir sıra yubileylər ilə əlamətdar olduğunu - müsəlman Şərqində ilk parlament respublikası olan Azərbaycan Demokratik Respublikasının 105, Azərbaycan teatrının 150, Azərbaycan kinematoqrafiyasının 125, müsəlman dünyasında ilk opera olan “Leyli və Məcnun” operasının 115 illiyinin qeyd olunduğunu söyləmişdir.
Çoxəsrlik Azərbaycan musiqisinin öz hüdudlarını aşaraq qlobal musiqi irsinin ayrılmaz hissəsinə çevrildiyini qeyd edən səfir N.Qurbanova Azərbaycanın musiqi məbədi olan Şuşa şəhəri barədə izləyicilərə məlumat vermişdir. O əlavə etmişdir ki, Azərbaycanın demək olar ki, bütün tanınmış musiqiçiləri – xanəndələr, instrumental ifaçılar, bəstəkarlar “Şərqin Konservatoriyası” hesab olunan və 2023-cü ildə “Türk Dünyasının Mədəniyyət Paytaxtı” olan Şuşa şəhərindəndir. O, Şuşanın həm də müsəlman Şərqində ilk operanın müəllifi olan görkəmli Azərbaycan bəstəkarı Üzeyir Hacıbəyovun vətəni olduğunu vurğulamışdır. Eyni zamanda N.Qurbanova yaxın günlərdə bəstəkarın doğulduğu Şuşa şəhərinin Üzeyir Hacıbəyov XV Beynəlxalq Musiqi Festivalına ev sahibliyi etdiyini diqqətə çatdırmışdır.
N.Qurbanova Bıdqoşç musiqi festivalı tarixində ilk dəfə olaraq azərbaycanlı musiqiçilərin iştirakını böyük məmnuniyyət hissi ilə qeyd etmiş, konsert proqramında musiqiçilər tərəfindən səsləndiriləcək muğam barədə izləyicilərə məlumat vermişdir. O, Azərbaycan muğam sənətinin YUNESKO-nun qeyri-maddi mədəni irsin qorunması üzrə reprezentativ siyahısına daxil edilməsi, müxtəlif muğam məktəbləri – Bakı, Şamaxı, Gəncə, Qarabağ muğam məktəbləri barədə danışmışdır.
Pomeraniya Filarmoniyasının direktorunun müavini Ts.Nelkovski çıxış edərək Beynəlxalq Musiqi Günündə Azərbaycan musiqi gecəsinin təşkilindən məmnunluğunu bildirmişdir. Ölkələrimiz arasında tarixən mövcud olmuş mədəni əlaqələr diqqət çəkən Ts.Nelkovski Azərbaycanda memarlığın inkişafına polyak memarların töhfəsindən bəhs etmişdir. Ədəbi və digər sahələrdə də ölkələrimiz arasında əlaqələrə toxunan direktor müavini təşkil olunan konsert gecəsinin bu əlaqələrin davamı olduğunu qeyd etmişdir.
600-dan artıq insanın iştirak etdiyi konsert proqramının sonunda qonaqlara Azərbaycan şərabları, ölkəmizin ləziz mətbəxindən təamlar təqdim olunmuşdur.
Konsert çərçivəsində musiqiçilərimiz Polşa Televiziyasının Bıdqoşç bölməsinə müsahibə vermişlər. Konsert polşalı musiqisevərlər tərəfindən böyük maraq və rəğbətlə qarşılanmışdır.
Qeyd edək ki, Bıdqoşç şəhərində 1963-cü ildən etibarən keçirilən musiqi festivalına Pomeraniya Filarmoniyası ev sahibliyi edir. Polşanın mədəni həyatında mühüm hadisə hesab olunan festival həm Polşada, həm də onun hüdudlarından kənarda peşəkar musiqi dairələri arasında böyük nüfuza malikdir.
