https://innews.az/uploads/news/2023-10/_innews_0a77f01c405198d3eb7060c18_o.jpg
Meksikanın tanınmış “Milenio” qəzetində “Makronun uğursuzluq aludəsi: beynəlxalq arenada Fransa siyasətinin tənəzzülü” başlıqlı məqalə dərc olunub. Bu ölkənin ən nüfuzlu ali təhsil ocaqlarından biri olan Meksika Milli Muxtar Universitetinin professoru, siyasi şərhçi Talya İşcanın müəllifi olduğu məqalədə Fransa prezidenti Emmanuel Makronun hakimiyyətə gəldikdən sonra aldığı uğursuz qərarlar və atdığı yanlış addımlar nəticəsində Fransanın beynəlxalq arenadakı nüfuzunun və rolunun sarsılması, bunun bariz nümunəsi kimi belə uğursuz qərarlar nəticəsində ölkəmizə qarşı qərəzli münasibəti ilə Ermənistanla Azərbaycan arasındakı münasibətlərin normallaşması prosesində maneə törətməsindən bəhs olunur.
Məqalədə Avropanın enerji təhlükəsizliyi üçün strateji əhəmiyyət kəsb edən Qafqazda sabitliyin bərqərar olması üçün Ermənistanla Azərbaycan arasındakı münasibətlərin normallaşmasının vacibliyi vurğulanır, lakin Makron administrasiyasının bu prosesi dəstəkləmək əvəzinə hər vəchlə bu prosesə təxribat xarakterli qərarları ilə maneə törətdiyi qeyd olunur.
Həmçinin, Qranada görüşündən öncə Makronun Fransa xarici işlər nazirini Ermənistana göndərməsinin, onun orada Azərbaycan və Türkiyə əleyhinə qərəzli fikirlərlə çıxış etməsinin, fransız lobbisinin təsiri ilə Avropa Parlamentində normallaşma prosesini çətinləşdirən Azərbaycan və Türkiyəyə qarşı qərəzli və əsassız daha bir qətnamənin qəbulunun Makronun regionda sülhün bərqərar olmasında maraqlı olmadığının göstəricisi olduğu bildirilir.
Məqalədə separatist rejimin ləğvi ilə regionumuzda sülh prosesinin qarşısında duran son maneənin aradan qaldırıldığı, habelə BMT-nin Qaçqınlar üzrə Ali Komissarlığının bəyanatları ilə regionda heç bir “etnik təmizləmə”nin olmadığının açıq şəkildə göstərildiyi və bununla da Fransanın əsassız iddialarının yalnız dezinformasiyaya səbəb yaratdığı vurğulanır.
Müəllif Fransanın Azərbaycana qarşı qərəzli mövqeyi nəticəsində Avropa Parlamentinin Azərbaycana qarşı sanksiyalar tətbiq etmək və Avropanın bəzi siyasətçilərinin hətta Azərbaycan qazının alınmasının dayandırmaq təkliflərini xatırladaraq, Makronun bu kimi uğursuz qərarlarının digər Avropa ölkələrinin enerji vəziyyətini təhlükə altında qoyduğuna diqqət çəkir.
