https://innews.az/uploads/news/2023-11/_innews_3cc6d75541c93465533d4f685_o.jpg
Meksikanın və Latın Amerikasının ən böyük və nüfuzlu ali təhsil müəssisəsi olan Meksika Milli Muxtar Universitetinin (UNAM – Universidad Nacional Autónoma de México) Siyasi və Sosial Elmlər Fakültəsinin tələbələri Azərbaycanın bu ölkədəki Səfirliyini ziyarət ediblər.
UNAM-ın Siyasi və Sosial Elmlər Fakültəsinin Tədqiqat Professoru Talya İşcanın iştirakı ilə Səfirlikdə keçirilən təqdimatda bu ölkədəki səfirimiz Məmməd Talıbov Azərbaycanın müstəqillik ənənələri, tarixi, dövlət müstəqilliyinin bərpa edilməsindən bəhs edib. Diplomat həmçinin müstəqilliyimizin ilk illərində qarşıya çıxan çətinliklər, bu il anadan olmasının 100 illiyi qeyd olunan Ümummilli lider Heydər Əliyevin həyatı və fəaliyyəti, onun Azərbaycan dövlətinin qurulmasında müstəsna rolu, eləcə də Ulu Öndərin uzaqgörənliyi və ideyaları əsasında regionda həyata keçirilmiş dünya miqyaslı enerji və nəqliyyat layihələri nəticəsində həm region, həm də bütün Avrasiya miqyasında geosiyasi proseslərdə baş verən müsbət dəyişikliklər barədə tələbələrə məlumat verib.
Səfir həmçinin, erməni təcavüzünün tarixi, 44 günlük müharibə və nəticələri, regiondakı yeni reallıqlar, davam edən sülh prosesi, ölkəmizin neft-qaz strategiyası, iqtisadi inkişaf göstəriciləri, incəsənəti, milli mətbəxi və multikulturalizm ənənələri haqda məlumat verib. Hazırda ölkəmizdə aparılan genişmiqyaslı bərpa-quruculuq işləri, məcburi köçkünlərin qayıdışının təhlükəsiz və ləyaqətli şəkildə həyata keçirilməsi üçün həyata keçirilən tədbirlər, həmçinin Azərbaycan Respublikasının Silahlı Qüvvələri tərəfindən son dövrdə Qarabağ iqtisadi rayonunda keçirilən lokal xarakterli antiterror tədbiləri və onun nəticələri, habelə Qarabağın erməni sakinlərinin reinteqrasiyası barədə məlumat verilib.
Bundan əlavə Meksika ilə Azərbaycan arasındakı ikitərəfli əlaqələr, son dövrlərdə həyata keçirilən qarşılıqlı səfərlər, ölkələrimiz arasında mədəniyyət, turizm və digər sahələrdə əməkdaşlıq imkanlarının genişləndirilməsi, eləcə də xarici tələbələr üçün ölkəmizdə mövcud olan təhsil imkanları, təcrübə və təqaüd proqramları barədə məlumat verilib, həmçinin tələbələr tərəfindən ünvanlanan çoxsaylı suallar cavablandırılıb.
