https://innews.az/uploads/news/2023-12/_innews_8e60750b6225b6cb37ad64f88_o.jpg
Gəlin düşünək: kimdir qəhrəman? Heç tərəddüd etmədən ağla gələn ilk ifadə bu olur: Vətəni yolunda ölümü gözə alıb, düşməninə qan udduran bahadır. Onlar tarix yazaraq gələcək aylara, illərə, əsrlərə öz gələcəyini qurban verməyə hazır oldular. Körpələr beşikdə rahat yatsın deyə, düşmənin gözünə baxışlarıyla od ələdilər, canlarına vəlvələ saldılar. "Mən gedirəm, dönməsəm haqqınızı halal edin" – kəlməsini hayqıraraq söylədilər, yollarından dönmədilər. Topun, tüfəngin mərmisinə, gülləsinə "sinə açan" Arkoldan fərqli olaraq, bizim qəhrəman gənclərin igidliyi çox məsələyə aydınlıq gətirdi, xalqa qalibiyyət, düşmənə dərd yaşatdı.
Bizim qəhrəmanlar milyonların dilindən "Haqqımız sənə halal olsun" – deyə bildiyimiz müqəddəs ünvanlardır.
Əziz oxucu, Sizə qəhrəmanlarımız Ağdaş rayonu Qoşaqovaq kəndinin ll Qarabağ müharibəsində iştirak edən ər oğullarının – mayor Xəlilov Rüfət Sahib oğlunun hərbi savadından, döyüşçü iradəsindən, baş leytenant Paşayev Zaur Fərhad oğlunun sarsılmaz əqidəsindən, İsmayılzadə Ayxan Aydın oğlunun misilsiz şücaətindən, Qarayev Elmir Rizvan oğlunun yağı düşməni lərzəyə salan baxışından, Məmmədzadə Bəhram bayram oğlunun qeyrətindən, Səmədov Nurlan Möhlüd oğlunun böyük ürəyindən, Xəlilov Cəlal Təqrəddin oğlunun göstərdiyi dəyanətdən, Lətifov Mirdamət Əvəz oğlunun keçdiyi çətin və şərəfli yoldan, Əzizov Əmrah Haris oğlunun sınmayan iradəsindən, Qarayev Süleyman Vahid oğlunun cəbhədəki çətin günlərindən, Əhmədov Məmməd ilham oğlunun mərdliyindən, Muxtarov Aqil Firidun oğlunun ön xətdə apardığı mübarizədən, Süleymanov Tural İslam oğlunun haqq deyən sözlərindən, Muxtarov Yadigar Şirxan oğlunun ayaq basdığı torpağdan, Muxtarov Əfqan Mirsahib oğlunun göstərdiyi qəhrəmanlıqdan, Süleymanov Süleyman İsmayıl oğlunun düşməni qorxuya salan nərəsindən, Həşimov Bilal Səbuhi oğlunun döyüş bacarığından, Paşayev Elşad Elşən oğlunun sərrast atıcılığından, müharibədən ən son qayıdan Səmədov Zaur Azər oğlunun həsrətindən, Hümbətov Rövşən Yura oğlunun səsindən, Salamov Bəhman Habil oğlunun məğrur duruşundan, Salamov Cəlil Muğdət oğlunun vətənə bağlılığından, Hacıyev Araz Ayaz oğlunun sönməz vətən eşqindən və sonda Əhmədov Əhmədiyyə Qüdrət oğlunun yarım qalmış arzularından danışmaq istəyirəm. Şükürlər olsun ki, bu igidlərin hər biri bu gün sağ-salamatdır. Təkcə Əhmədov Əhmədiyyə Qüdrət oğlundan başqa.
Bəli, 44 gün ərzində düşmən mərmisinin yıxa bilmədiyi igidimizi müharibə başa çatdıqdan sonra "Qaraciyər sirrozu" bizdən aldı. Nə deyək qismət beləymiş. Geriyə yalnız bir söz qalır: "Əbədiyyət ünvanın nurlu olsun, ŞƏHİDİM".
Adını sadaladığım oğullarımız haqda ayrı-ayrılıqda çox şey danışmaq olar. Onların hər biri bizim qürur ünvanımızdır. Biz bilirik, Azərbaycan bütövdür, yıxılmazdır, basılmazdır. Azərbaycan qəhrəmanlar yurdudur, mərd oğullar diyarıdır. Onların şərəfli ismini dilə almağımız isə boyun borcumuzdur. Son olaraq qəhrəman ərənlərimizin müqəddəs ünvanlarına, uca adlarına xitabən bir bənd şeiri ərməğan edirəm:
Adınız qəhrəman, mərd oğul sizin
Şəninizə yazılsın böyük şeirlər.
Oxunsun hər yanda vətən mahnısı
Adınız özü bir dünyadı sizin!
Maarif Məmmədli, BDU Jurnalistika fakültəsinin tələbəsi
Ən son xəbərləri səhifəmizdən də izləyin
