DOST İnklüziv İnkişaf və Yaradıcılıq Mərkəzində Dünya Ekoloji Təhsil Günü ilə əlaqədar təlim təşkil olunub

Əmək və Əhalinin Sosial Müdafiəsi Nazirliyinin DOST İnklüziv İnkişaf və Yaradıcılıq Mərkəzində 26 yanvar - Dünya Ekoloji Təhsil Gününə həsr olunmuş “Bioloji müxtəlifliyin qorunması” mövzusunda təlim təşkil olunub.

Təlim dövlət başçısının müvafiq Sərəncamı ilə 2024-cü ilin "Yaşıl dünya naminə həmrəylik ili" elan edilməsi ilə əlaqədar həssas qruplara aid şəxslərin ekoloji maarifləndirilməsi, onların diqqətinin ətraf mühitin mühafizəsi işinə yönəldilməsi məqsədi daşıyıb. Ekologiya və Təbii Sərvətlər Nazirliyinin Bioloji Müxtəlifliyin Qorunması Xidmətinin mütəxəssisləri Günel Hökməliyeva və Samir Süleymanov Azərbaycan faunası və xüsusi mühafizə olunan təbiət əraziləri barədə təlim iştirakçılarına məlumat verib. Yer kürəsində, həmçinin ölkəmizdə təbii şəraitin müxtəlifliyini, canlılar aləminin rəngarəngliyini əks etdirən videoçarxlar nümayiş olunub. Təlimə Mərkəzin 8-22 yaş arası 20 nəfərədək benefisiarı cəlb edilib. Sonda Mərkəzin kitabxanasına və iştirakçılara mövzu ilə bağlı maarifləndirici kitablar, həmçinin ekoçantalar hədiyyə edilib.