https://innews.az/uploads/news/2024-02/_innews_4fb0288a8d96892b3c964fcb2_o.jpg
Gənclik gözəllikdir, ümiddir. Düzgün tərbiyə olunmuş, təhsil almış, öz biliyi və bacarığı sayəsində hər hansı bir peşəyə yiyələnmiş zəkalı və bacarıqlı gənclər isə millətin və dövlətin nurlu gələcəyidir. 2 Fevral Azərbaycan Gəncləri günüdur. Bu əlamətdar və tarixi günün əsası Ulu öndər Heydər Əliyev tərəfindən qoyulmuşdur. Gözəl bilirik ki, Ulu Öndər gənclərə həmişə böyük diqqət və qayğı ilə yanaşmış, onların problemlərinin həlli istiqamətində əvəzsiz işlər görmüşdür. Əsası Ümummilli lider tərəfindən qoyulan dövlət gənclər siyasəti Azərbaycan gəncliyinin inkişafında mühüm rol oynayıb. Xüsusi vurğulanmalı məqamlardan biri bir zamanlar Ulu Öndərin Azərbaycan gəncliyinə olan etimadıdır. Məhz bu inam və etimad bu gün artıq öz təsdiqini tapmışdır. Bu gün ölkəmizdə gənclər siyasəti mahiyyəti və keyfiyyətcə yeni mərhələsini yaşayir. Müzəffər Prezidentimiz cənab İlham Əliyev Ulu Öndərin bu istiqamətdə siyasətini davam və inkişaf etdirərək, daha böyük uğurların qazanılmasına nail olmuşdur. Gənclərin mənəvi inkişafı, vətənpərvərlik tərbiyəsi, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması və inkişafı üçün yaradılan şərait və imkan bu sahəyə olan böyük diqqət və qayğının nəticəsidir.
Dövlət başçımızın 2007-ci il 16 aprel tarixli Sərəncamına əsasən təsdiq edilmiş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” bütün təbəqədən olan gənclərin dünyanın ən nüfuzlu təhsil ocaqlarında təhsil almasına böyük imkan yaradıb. Bu gün Azərbaycan gəncləri bir çox sahələrdə olduğu kimi idman sahəsində də böyük uğurlara imza atır. Cənab Prezident İlham Əliyevin qətiyyəti, iradəsi və böyuk səyləri nəticəsində Ölkəmiz dünyanın qabaqcıl idman ölkələrindən birinə çevrilib. Gənc idmançılarımızın Olimpiya və dünya çempionatlarında, beynəlxalq yarışlarda uğurlu çıxışları bunun əyani sübutdur. Ölkə başçımız tərəfindən gənclərin intellektual, fiziki və mənəvi inkişafını ölkənin sosial-iqtisadi, ictimai-siyasi və mədəni həyatında fəal iştirakını təmin etmək məqsədilə 2015-ci il yanvarın 26-da “2015-2025-ci illərdə Azərbaycan gənclərinin İnkişaf Strategiyası”-nın təsdiq edilməsi haqqında Sərəncam imzalanması bu sahəyə olan dövlət qayğısının bariz nümayişidir. Qeyd edək ki, bu sənədin əsas məqsədi Azərbaycanda gənclər siyasətinin daha səmərəli həyata keçirilməsinə nail olmaq, cəmiyyətin bütün sahələrində gənclərin fəal iştirakına şərait yaratmaqdır. Bu gün Azərbaycan gənci sosial həyatın bütün sferalarında uğurla iştirak edir. Azərbaycan gəncləri üçün ən həlledici sınaqlardan biri 44 günlük Vətən Müharibəsi oldu. Müzəffər Ordumuzun sıralarında Vətən uğrunda qəhrəmanlıqla vuruşan igid, rəşadətli gənclərimiz adlarını xalqımızın tarixinə qızıl hərflərlə yazdırdılar. Azərbaycan gənci vətən uğrunda döyüşlərlə yanaşı arxa cəbhədə də yüksək fəallıq göstərdi. Artıq gənclərimiz bu günü - 2 fevral Gənclər gününü qalıb ölkənin məğrur və qürurlu vətəndaşları kimi qeyd edirlər.
Anar Güllərli;
Neftçala rayon gənci
Ən son xəbərləri səhifəmizdən də izləyin
