https://innews.az/uploads/news/2024-03/_innews_d9aec63800b0943b1cce18601_o.jpg
Finlandiyanın Espo şəhərinin Lippulaiva kitabxanasında fotoqraf Etibar Cəfərovun müəllifi olduğu “Azərbaycan-Multikulturalizm diyarı” adlı növbəti kitab-albomun təqdimatı və eyniadlı fotosərginin açılışı baş tutub. Diasporla İş üzrə Dövlət Komitəsinin (DİDK) dəstəyi ilə nəşr olunmuş kitabda ölkəmizin multikultural dəyərləri öz əksini tapıb.
Helsinki Azərbaycan Evinin təşkilatçılığı ilə keçirilən tədbirdə yerli ictimaiyyətin, eləcə də Azərbaycana dost münasibəti bəsləyən icmaların üzvləri, Helsinki, Espo, Tampere, Nokia və Vanta şəhərlərində yaşayan diaspor nümayəndələri iştirak edib. Espo şəhər kitabxanasının sabiq direktoru, kitabxananın layihələr departamentinin rəhbəri Yana Turni (Jana Tyrni) Azərbaycanın multikultural və tolerant dəyərlərinin zənginliyi və dünya mədəniyyətləri sırasında xüsusi yeri olduğunu bildirib və burada “Azərbaycan Günləri”nin keçirilməsinin yerli ictimaiyyətin maraqla qarşılamasından danışıb.
Helsinki Azərbaycan Evinin rəhbəri Ülviyyə Cabbarova çıxışında xalqımızın multikultural dəyərlərinin Azərbaycan diasporuna təsir imkanlarından danışaraq, soydaşlarımızın yerli cəmiyyətə inteqrasiyası və əldə olunan uğurlar barədə fikirlərini bölüşüb.
Kitabın müəllifi E.Cəfərov kitabın ərsəyə gəlməsi haqqında nümayiş olunan fotoların tarixçəsi və Azərbaycan multikulturalizminin, milli adət-ənənələrinin rəngarəngliyindən və dəyərindən söz açıb.
DİDK-nın şöbə müdiri Xıdır Kazımov dünyada multikultural dəyərləri qoruyan ölkələr sırasında Azərbaycanın ön sıralarda olduğunu, bu dəyərlərin təbliği məsələsində diasporumuzun üzərinə böyük məsuliyyət düşdüyünü qeyd edib. O, Azərbaycanda müxtəlif mədəniyyətlərin formalaşmasında dövlət dəstəyindən danışıb və Komitənin bu istiqamətə yönəlmiş layihələrini dəstəkləməyə hazır olduğunu bildirib. “Azərbaycan-Multikulturalizm diyarı” adlı kitab izləyicilərə və kitabxanaya hədiyyə edilib. Gün ərzində 100-dən artıq izləyici bu fotosərgini ziyarət edib.
Qeyd edək ki, Helsinkinin “Oodi” kitabxanası və Finlandiyada fəaliyyət göstərən Azərbaycan Evi də “Azərbaycan-Multikulturalizm diyarı” adlı fotosərgiyə ev sahibliyi edib.
Ən son xəbərləri səhifəmizdən də izləyin
