https://innews.az/uploads/news/2024-04/_innews_bf76df11adf30487e25c695ff_o.jpg
Niderland-Belçika Azərbaycanlıları Koordinasiya Şurası, “Ana Vətən” Niderland Azərbaycanlı Qadınlar Birliyi, Benelüks Azərbaycanlıları Konqresi, Beynəlxalq Azərbaycanlı Xanımlar Klubu tanınmış isveçli iqlim fəalı Qreta Tunberqin Haaqada saxlanılması ilə bağlı bəyanat yayıblar.
Adı çəkilən diaspor təşkilatları bəyanatlarında Q.Tunberqin saxlanılmasından narahat olduqlarını bildiriblər.
Bəyanatda göstərilir ki, Q.Tunberq şənbə günü Niderlandda keçirilən nümayişdə polis tərəfindən iki dəfə bir neçə saatlıq saxlanılıb. O, əvvəlcə Haaqaya gedən əsas magistral yolu bağlamağa çalışan etirazçılarla birlikdə yerli polis tərəfindən qısa müddətə saxlanılıb. Sərbəst buraxıldıqdan sonra Q,Tunberq tez bir zamanda dəmiryol vağzalına gedən başqa yolu bağlayan kiçik etirazçılar qrupuna qoşulub. Orada onu ikinci dəfə saxlayıb polis mikroavtobusuna mindirib ərazidən uzaqlaşdırıblar. Etiraz aksiyasının təşkilatçısı “Ekstinkşn Rebelion”-un (“Extinction Rebellion”) sözçüsü “Röyters”ə (Reuters) bildirib ki, Q.Tunberq bir neçə saat saxlandıqdan sonra axşam yenidən sərbəst buraxılıb. İqlim fəalı jurnalistlərə dünya ekzistensial böhranla üzləşdiyi üçün etiraz etdiyini söyləyib: “Biz planetar fövqəladə vəziyyətdəyik. Biz insanların həyatlarını və dolanışıqlarını itirməsinə, “iqlim qaçqınları”na çevrilməsinə imkan verməyəcəyik”.
Bəyanatda sonda deyilir: “Tanınmış iqlim fəalı Qreta Tunberqin dinc nümayiş zamanı saxlanılması bizi narahat edir. Azərbaycan BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının ev sahibi olacağı üçün biz Hollandiya hakimiyyətini iqlim etirazlarının iştirakçılarının ifadə azadlığına hörmət bəsləməyə və saxlanılanları azad etməyə çağırırıq”.
Bəyanatlar Niderland Krallığının hüquq-mühafizə orqanlarına təqdim edilib.
Ən son xəbərləri səhifəmizdən də izləyin
