Təcili tibbi yardım briqadasının peşəkarlığı: ürək dayanması olan xəstə xilas edildi

Respublika Təcili və Təxirəsalınmaz Tibbi Yardım Mərkəzinə 29.05.2024-cü il tarixində saat 17:34 radələrində 69 yaşlı şəxsin (cinsi kişi) ürək ağrısı səbəbilə çağırış daxil olub.

Dərhal çağırış ünvanına təcili tibbi yardım briqadası göndərilib.

Təcili tibbi yardım briqadası tərəfindən xəstəyə ilkin tibbi xidmətlər göstərilməyə başlanılıb.

Reanimasion briqada tərəfindən xəstəyə elektrokardioqramma (EKQ) çəkilib və xəstəyə ağırlaşmış ritm pozğunluğu ilə müşayiət olunan kəskin miokard infarktı diaqnozu qoyulub.

Təcili tibbi yardım briqadasının nəzarəti altında Kliniki Tibbi Mərkəzə hospitalizasiya zamanı xəstədə ürəyin qəfləti dayanması qeydə alınıb.

Təcili tibbi yardım briqadası tərəfindən aparılan ürək masajı, oksigen terapiyası, ürək-ağciyər reanimasiya (defibrillyator tətbiqi ilə) tədbirləri və operativ müdaxilə nəticəsində xəstədə ürək fəaliyyəti, normal ritm bərpa edilib, aparılan bütün reanimasion tədbirlər effektiv olub.

Xəstə uğurla hospitalizasiya olunub.