https://innews.az/uploads/news/2024-06/_innews_99d51527d8fe93b4b97af0c45_o.jpg
Azərbaycan Respublikası Dövlət Miqrasiya Xidmətinin rəisi Vüsal Hüseynovun rəhbərlik etdiyi nümayəndə heyəti Türkiyəyə rəsmi səfər edib.
Səfərin ilk günündə Türkiyə Respublikasının qurucusu Qazi Mustafa Kamal Atatürkün məqbərəsi ziyarət edilib, Türk dünyasının görkəmli siyasi xadiminin xatirəsinə ehtiram ifadə olunub.
Dövlət Miqrasiya Xidmətinin rəisi V.Hüseynovun ilk rəsmi görüşü Türkiyənin daxili işlər naziri Ali Yerlikaya ilə olub.
Görüşdə iki ölkə vətəndaşlarının qarşılıqlı miqrasiyasının tənzimlənməsi və bu sahədə ikitərəfli əməkdaşlıqla bağlı fikir mübadiləsi aparılıb.
Daha sonra Nazirliyin Miqrasiya İdarəsinin rəisi Atilla Torosla keçirilən görüşdə müvafiq sahədə əməkdaşlıq müzakirə olunub və iki ölkə arasında “Miqrasiya sahəsində əməkdaşlığa dair Saziş” imzalanıb.
Hər iki görüşdə Azərbaycan vətəndaşlarının Türkiyədə miqrasiya sahəsində qarşılaşdıqları problemlər müzakirə olunub, onların həlli istiqamətində yeni qaydalar müəyyənləşdirilib və müvafiq təlimatlar verilib.
Rəsmi görüşlərin ardından nümayəndə heyəti Ankaradakı Heydər Əliyev parkında yerləşən Ümummilli lider Heydər Əliyevin abidəsini ziyarət edib. Abidə önünə çiçək qoyulub və Ulu Öndərin əziz xatirəsi anılıb.
