Güləşçimiz Alyona Kolesnik V İslam Həmrəyliyi Oyunlarına qələbə ilə başlayıb

Azərbaycanın qadın güləşçisi Alyona Kolesnik Türkiyənin Konya şəhərində təşkil olunan V İslam Həmrəyliyi Oyunlarına qələbə ilə başlayıb.

Konya Texniki Universitetinin idman salonunda təşkil olunan yarışda 59 kiloqram çəki dərəcəsində çıxış edən “Bakı-2017” dördüncü İslam Həmrəyliyi Oyunlarının gümüş medalçısı ilk görüşdə Qazaxıstan təmsilçisi Dürdana Bekeş ilə qarşılaşıb. Təmsilçimiz rəqibini 12:0 hesabı ilə məğlub edərək növbəti mərhələyə adlayıb.

Beşinci İslam Həmrəyliyi Oyunları 2021-ci ilin sentyabrında keçirilməli idi. Daha sonra pandemiya ilə əlaqədar yarışa hazırlığın tam aparılması üçün oyunların 2022-ci ilə təxirə salınması məqsədəuyğun hesab olunmuşdu. İlk dəfə İslam Həmrəyliyi Oyunları Səudiyyə Ərəbistanında keçirilib. Dördüncü İslam Həmrəyliyi Oyunlarına Azərbaycan ev sahibliyi edib.

azertag.az