https://innews.az/uploads/news/2024-11/_innews_c02120427e0f20c7a546c7197_o.jpg
Dini Qurumlarla İş üzrə Dövlət Komitəsinin sədri Ramin Məmmədov noyabrın 14-də Şirvan şəhər “Cümə” məscidində olub.
Məsciddə fəaliyyət göstərən din xadimləri ilə görüş zamanı Komitə sədri ölkəmizdə mövcud olan dövlət-din münasibətlərindən, dövlət rəhbərliyi tərəfindən din xadimlərinə göstərilən qayğıdan bəhs edib. R. Məmmədov eyni zamanda, milli-mənəvi dəyərlərimizin qorunması və təbliği istiqamətində Prezident İlham Əliyev tərəfindən müəyyən olunmuş dövlət siyasətinin prioritetlərindən, Birinci vitse-prezident Mehriban Əliyevanın rəhbərlik etdiyi Heydər Əliyev Fondunun bu istiqamətdə fəaliyyətindən danışıb.
Komitə sədri Azərbaycan dövlətinin dinlərarası dialoqun inkişafına verdiyi dəstəyin fərqli dinlərin nümayəndələrinin birgə fəaliyyəti üçün əlverişli şərait yaratdığını qeyd edib. Bu əməkdaşlığın və müxtəlif konfessiyalar arasında qarşılıqlı hörmətin ölkədə tolerantlığın inkişafına mühüm töhfə verdiyini vurğulayıb.
Din xadimləri dövlət tərəfindən dini sahəyə göstərilən qayğını yüksək dəyərləndirdiklərini, xalqımıza xas mənəvi dəyərlərin təbliğində fəal iştirak etməyə hazır olduqlarını bildiriblər.
