https://innews.az/uploads/news/2024-11/_innews_976fa9be7ef7bdfc0d52940f2_o.jpg
Dini Qurumlarla İş üzrə Dövlət Komitəsinin sədri Ramin Məmmədov noyabrın 14-də Şirvan şəhər “Zeynalabidin” məscidində olub.
Dövlət Komitəsinin sədri din xadimləri ilə görüşdə Prezident İlham Əliyevin rəhbərliyi ilə Azərbaycanda dövlət-din münasibətlərinin ən uğurlu modellərindən birinin formalaşdırıldığını qeyd edib. Bildirib ki, dini icmalara göstərilən qayğı, onların fəaliyyəti üçün daim geniş imkanların yaradılması milli-mənəvi dəyərlərimizə olan həssas münasibətin nümunəsidir. Ramin Məmmədov Azərbaycanda dini etiqad azadlığının ən yüksək səviyyədə təmin olunduğunu, ölkəmizin mədəniyyətlərarası və dinlərarası dialoq üçün mühüm məkana çevrildiyini deyib.
Görüşdə dini maarifləndirmə məsələsi xüsusi yer alıb. Komitə sədri İslam dininin düzgün şəkildə təbliğinin vacibliyini diqqətə çatdırıb. Dövlətin dini maarifləndirmə sahəsindəki siyasətinin xüsusilə gənclər arasında dini dəyərlərin düzgün formada aşılanmasına yönəldiyini, bu sahədəki fəaliyyətlərin cəmiyyətin mənəvi və mədəni inkişafına töhfə verməyə xidmət etdiyini bildirib.
Din xadimləri dini icmaların, milli-mənəvi dəyərlərin və vəhdət ənənələrinin inkişafına dövlət səviyyəsində göstərilən davamlı diqqət və qayğıya görə minnətdarlıqlarını ifadə ediblər.
Daha sonra görüləcək işlərə dair müzakirələr aparılıb, təkliflər səsləndirilib.
