https://innews.az/uploads/news/2024-11/_innews_cafcc6d337a2d2ecb3cf7857f_o.jpg
Narkomanlığa qarşı mübarizədə maarifləndirmə ən təsirli və davamlı nəticələr verən istiqamətlərdən biridir. Maarifləndirmə tədbirləri cəmiyyətin fərqli təbəqələrinə narkotiklərin zərərləri, onların yaratdığı sosial, psixoloji və fiziki fəsadlar haqqında doğru məlumatlar çatdırmaq üçün geniş imkanlar yaradır. Maarifləndirmə işləri yalnız informasiya ötürmək ilə deyil, həm də gənclərdə müsbət davranışların formalaşmasına və narkotiklərdən uzaq durmaq üçün motivasiya yaratması baxımından da əhəmiyyətlidir.
Azərbaycanımızın davamlı imkanlarını və dayanıqlı inkişafını, beynəlxalq və regional səviyyədə bütün istiqamətlər üzrə əldə etdiyi yüksək göstəricilərini nəzərə alaraq, əminliklə qeyd edə bilərəm ki, narkomanlığa və narkotik vasitələrin qanunsuz dövriyyəsinə qarşı maarifləndirmə sahəsində təşkil edilən tədbirlər yeniyetmə və gənclərin yaşlarına və inkişaf səviyyələrinə uyğun təşkil edilməklə və burda interaktiv metodlara (söhbətlər, rollu oyunlar və real hekayələr əsasında narkomaniyanın riskləri haqqında məlumatlar) üstünlük verərək uğurlu nəticələr əldə edə bilərik.
Bundan əlavə narkotik vasitələrin qanunsuz dövriyyəsinə qarşı mübarizədə valideynlərin maarifləndirilməsi çox önəmlidir. Ailə mühitində düzgün tərbiyə və məlumatlandırma uşaqların riskli davranışlardan uzaq durmasında effektiv rol oynayır. Ona görə də valideynlərə narkotiklərin əlamətləri, risk faktorları və profilaktika yolları haqqında məlumat və o cümlədən valideynlərin uşaqları ilə düzgün ünsiyyət qurması üçün psixoloji məsləhətlər verən seminar və vebinarların sayını artırmağı hədəf seçməliyik. Bu tədbirlər valideynlərin maariflənməsini artırmaqla yanaşı, onların övladları ilə daha sağlam münasibət qurmasına kömək edəcək.
Həmçinin gənclərin marağını cəlb etmək və onlara zərərin ciddiliyini izah etmək üçün müxtəlif formatlardan istifadə etmək olar. Məsələn, daha kreativ və interaktiv yanaşmalardan istifadə edərək narkomanlıqla mübarizə mövzusunda təsirli kontent hazırlayaraq, gənclərin aktiv olduğu sosial media platformalarında paylaşılmasını təmin etmək olar.
Eyni zamanda effektiv məlumatlandırma işlərində qeyri-hökumət təşkilatlarının həm də ictimaiyyətin birgə iştirakı da vacibdir.
Nəticə etibarı ilə təsirli metodlarla təşkil edilən maarifləndirmə tədbirləri sayəsində psixoaktiv maddələrdən istifadənin təhlükələri barədə məlumatlılıq səviyyəsi daha da artar və zərərli vərdişlərə qarşı neqativ münasibətin formalaşması genişlənər.
Sonda onu deyə bilərəm ki, maarifləndirmə işlərində hər bir valideynin və gəncin rolu əvəzsizdir. Sağlam gələcək naminə gəlin, bu yolda bir-birimizə dəstək olaq və maarifləndirmənin gücünə inanaq.
