https://innews.az/uploads/news/2024-12/_innews_d27eed014cc13aa1e147582cf_o.jpg
Azərbaycanın Polşadakı Səfirliyi ölkəmizin Polşada akkreditə edilmiş Mərkəzi Avropa Ölkələri üzrə Ticarət Nümayəndəsinin Aparatı və Polşa Azərbaycanlıları Şurası ilə birgə Polşa Respublikasının Birinci xanımı Aqata Kornhauzer-Dudanın himayəsi altında “Polşada akkreditə olunmuş Diplomatik Missiya Rəhbərlərinin Xanımları” Assosiasiyası (SHOM) tərəfindən təşkil olunmuş 17-ci xeyriyyə bazarında (Charity Bazaar) ölkəmizi təmsil etmişdir. Tədbirdə Polşada akkreditə edilmiş əksər diplomatik nümayəndəliklər, bu ölkədə fəaliyyət göstərən xeyriyyə təşkilatları iştirak etmişlər.
Tədbirdə ziyarətçilərə təqdim olunmuş plov, YUNESKO-nun Qeyri-Maddi Mədəni İrs üzrə Reprezentativ Siyahısına daxil edilmiş dolma, milli şirniyyatlarımızdan şəkərbura, paxlava, badambura və digər təamlar böyük marağa səbəb olmuşdur. Azərbaycan stendində ölkəmizdə istehsal olunan müxtəlif növ içkilər, şirə və kompotlar, narşərab, mürəbbə və müxtəlif konservlər, çay növləri bazar ziyarətçiləri tərəfindən həvəslə alınmışdır.
Tədbir çərçivəsində Polşa Respublikasının Birinci xanımı Aqata Kornhauzer-Duda stendimizi ziyarət edərək nümayiş olunan məhsullar ilə tanış olmuşdur.
Tədbirdə çıxış edən səfir Nərgiz Qurbanova Səfirliyin xeyriyyə bazarında təmsil olunmasından məmnunluğunu bildirmişdir. N.Qurbanova ziyarətçilərə ölkəmizin zəngin mədəniyyəti barədə məlumat verərək bu zəngin mədəniyyətin özünü ecazkar musiqimiz, ritmik rəqslərimiz, incə miniatür rəsmlərimiz, əl ilə toxunmuş ecazkar xalçalarımız, nəfis mətbəximizdə büruzə verdiyini bildirmişdir.
O, Azərbaycan mətbəxinin dünyanın ən zəngin və ləziz mətbəxlərindən olduğunu vurğulayaraq bu füsunkar mətbəxin parlaq nümunələri barədə məlumat vermişdir. Səfir qeyd etmişdir ki, heç şübhəsiz, plovu Azərbaycan mətbəxinin şah əsəri hesab etmək olar. Çoxlu sayda müxtəlif çeşidləri olan bu yeməyin ziyafətlərdə, bayramlarda, xüsusilə Novruz bayramı zamanı masaların “tacı” olduğunu qeyd etmişdir. Səfir zəngin milli mətbəximizin daha bir dadlı və unikal təamlarından olan dolmanın 2017-ci ildə YUNESKO tərəfindən Bəşəriyyətin Qeyri-Maddi Mədəni İrsi siyahısına daxil edildiyini əlavə etmişdir.
Daha sonra milli folklorumuzun ayrılmaz hissəsi olan rəqslərimiz barədə danışan səfir rəqslərin hər bir xalqın mədəniyyətinin bir hissəsi olduğunu söyləyərək milli rəqslərin xalqın tarixini, adət-ənənəsini, xarakterini özündə ehtiva etdiyini diqqətə çatdırmışdır. O, tədbirdə ifa olunan Azərbaycanın ən məşhur və zərif rəqslərindən olan “uzun dərə” mənasını verən “Uzundərə” rəqsi barədə məlumat vermişdir. O, bu möhtəşəm rəqsin Qarabağda, Ağdamla Göytəpə arasında yerləşən Uzundərə ərazilərində yarandığını və həm toylarda, həm də digər şənliklərdə çox vaxt qadınlar tərəfindən, bəzən isə cütlük şəklində ifa olunduğunu əlavə etmişdir. Səfir rəvayətə görə gəlin apararkən yolun dərənin içərisindən keçdiyindən və uzun olduğundan, musiqiçilərin gəlini lirik bir musiqi ilə müşayiət etdiyini və bu zaman rəqs etdiyini bildirmişdir. N.Qurbanova dahi Azərbaycan bəstəkarı Üzeyir Hacıbəyovun "O olmasın, bu olsun" (1911) operettasında “Uzundərə” rəqsinin melodiyasından istifadə etdiyini diqqətə çatdırmışdır.
Sonda N.Qurbanova ənənəvi Azərbaycan mətbəxinin təamlarını dadmaq və Azərbaycanda istehsal olunan müxtəlif növ məhsulları almaq üçün ziyarətçiləri stendimizə dəvət etmişdir.
Xeyriyyə bazarının bədii hissəsində Polşada yaşayan Azərbaycan diasporunun nümayəndələrinin, eləcə də polyak gənclərin ifasında “Uzundərə” rəqsi və “Azərbaycan” mahnısı səsləndirilmişdir. İfalar ziyarətçilər tərəfindən böyük rəğbətlə qarşılanmışdır.
Tədbirdə ilk dəfə olaraq Azərbaycanda polyak icmasının nümayəndələrinin sənət əsərləri və əl işləri də nümayiş olunmuşdur.
Səfir N.Qurbanova tədbir çərçivəsində Polşanın “TVP3” televiziya kanalında yayımlanan populyar “Dobrego dnia” proqramına və həftəlik “Tygodnik Solidarność” qəzetinə müsahibə verərək izləyicilərə zəngin Azərbaycan mədəniyyəti, o cümlədən YUNESKO-nun Qeyri-maddi mədəni irs siyahısına daxil olan Azərbaycan mədəniyyət nümunələri, rəngarəng milli rəqslər, Azərbaycan stendində nümayiş olunan məhsullar barədə məlumat vermişdir.
Azərbaycan stendində həmçinin ənənəvi çay dəstgahı nümayiş olunmuşdur. Armudu stəkanlarda çay, müxtəlif mürəbbə növləri, limon, ləbləbi, milli şirniyyatlarımızdan ibarət çay süfrəsi ziyarətçilərin marağına səbəb olmuşdur.
Qeyd edək ki, builki xeyriyyə bazarında 50 ölkə iştirak etmişdir.
