https://innews.az/uploads/news/2024-12/_innews_53c80cbf365878e737190d683_o.jpg
2024-cü il ərzində Prezident İlham Əliyevin rəhbərliyi altında Azərbaycan, beynəlxalq arenada əhəmiyyətli mövqe tutmuş, qlobal miqyasda mühüm təsir gücünə malik bir ölkəyə çevrilmişdir. Prezidentin strateji baxışı və prinsipial siyasəti nəticəsində Azərbaycan təkcə regional deyil, həm də qlobal miqyasda təsirli qərarların iştirakçısına çevrilmişdir.
2024-cü ildə Azərbaycan Qoşulmama Hərəkatının üzv ölkələri arasında əlaqələri gücləndirmək, D8 “İslam Səkkizliyi” ölkələri təşkilatına üzv qəbul olunmaq, COP29-a ev sahibliyi etmək, iqtisadi əməkdaşlığı təşviq etmək və sülh çağırışlarını önə çıxarmaq istiqamətində mühüm nəticələr əldə etmişdir. Bu nailiyyətlər, Azərbaycanın beynəlxalq aləmdə artan nüfuzunun bariz göstəricisidir.
Azərbaycanın regionda təhlükəsizlik və sabitlik təşəbbülləri çərçivəsində görülən işlər, onun qlobal miqyasda artan rolu və əhəmiyyətini daha da gücləndirmişdir. 2020-ci ildə 44 günlük Vətən müharibəsi nəticəsində Qarabağın işğaldan azad edilməsi və bu istiqamətdə həyata keçirilən quruculuq işləri, Azərbaycanın regional liderliyini daha da möhkəmləndirmişdir. Bu siyasət, bölgədə sülhün təmin edilməsi və əməkdaşlıq imkanlarının yaradılması üçün görülən addımları özündə ehtiva edir.
2024-cü il həmçinin Qərb ölkələrinin Cənubi Qafqaz regionunda qeyri-hökumət təşkilatları vasitəsilə öz nüfuzunu gücləndirməyə çalışdığını, zərərli ideologiyalar yaymağa cəhd etdiyini, region ölkələrinin milli maraqlarına zidd olan müxtəlif fəaliyyətləri maliyyələşdirməyə çalışdığı il kimi yadda qaldı. Bəzi donor təşkilatlarının qeyri-şəffaf maliyyələşmə ilə Gürcüstanda destruktiv fəaliyyətləri və radikal təşkilatları maliyyələşdirdiyini, bunun Gürcüstanın təhlükəsizliyinə təhdid törətdiyini hazırkı Gürcüstan höküməti nümayəndələri çıxışlarında qeyd etmişdirlər.
Qərb son 20 ilə yaxın müddət ərzində Ermənistanda və Gürcüstanda QHT sektoruna yüz milyonlarla dollar yatırım edib, qrantlar ayırıb və nəticədə, orada QHT sektoru, həqiqətən də, qərbyönümlü və ideoloji səviyyəyə gəlib. Təəssüf ki, bu hal ölkənin daxili siyasətinə də təsir edir. Uzun illər ərzində vətəndaş cəmiyyəti, qeyri-hökumət təşkilatları, media sahəsində aparılan fəaliyyətin nəticəsi bu gün göz qabağındadır. Qərb Gürcüstana, eləcə də Ermənistana müxtəlif vədlər verərək Cənubi Qafqazda möhkəmlənmək istəyir.
Ermənistan və Gürcüstandan fərqli olaraq Qərb dairələri Azərbaycanda da bu cəhdləri həyata keçirməyə çalışsalar da, cəmiyyətimizdə mövcud olmuş oturuşmuş qaydalara qarşı yad elemetlərdən ibarət mədəniyyətlərin yeridilməsi və bu kimi təhdidlərə qarşı vaxtında qəbul edilmiş qanunvericilik aktları və cəmiyyətimizin həmrəyliyi, oturuşmuş ailə dəyərləri, vətəndaşların ayıq-sayıqlığı nəticəsində uğurlu mübarizə aparılmışdır.
Azərbaycan müstəqil siyasət həyata keçirir və region üzrə gündəliyin müəyyən olunmasında söz sahibinə çevrilmişdir.
COP29-un yekununda qəbul edilən qərarlar bəşəriyyətin gələcəyi üçün müstəsna önəm daşımaqla bərabər, Azərbaycanın beynəlxalq nüfuzunu bir daha nümayiş etdirdi. Bu tədbirdə, Azərbaycan iqlim dəyişikliyi sahəsində qlobal ədalət prinsiplərinə sadiqliyini və dünya birliyinin gözləntilərinə cavab verən nəticələr əldə etməyə sadiqliyini ortaya qoydu.
2024-cü ildə Azərbaycan milli qeyri-hökumət təşkilatlarının beynəlxalq aləmdə mövqeyini daha da möhkəmlənməsi kimi yadda qaldı. COP29 sammitində iqlim dəyişikliyi və regional əməkdaşlıq sahəsində təşəbbüsçü rol oynaması, Azərbaycanın ekoloji və humanitar məsələlərdə fəal iştirakını təmin etdi. Bu fəallıq, milli QHT-lərin qlobal partnyorlarla əməkdaşlıq etməsi üçün yeni imkanlar yaratmışdır.
Azərbaycanın Cənubi-Cənub əməkdaşlığını dəstəkləməsi, Qlobal Cənub ölkələri ilə ortaq layihələrin yaradılması və dərinləşdirməsi üçün şərait yaratmışdır. COP29 QHT Koalisiyası bu əməkdaşlığın institusional platformasına çevrilmişdir. Bununla yanaşı, Azərbaycanın QHT-ləri, COP29 və digər beynəlxalq tədbirlər vasitəsilə öz təcrübələrini və innovativ həllərini qlobal miqyasda nümayiş etdirmişdir.
Prezident İlham Əliyevin siyasəti nəticəsində Azərbaycanın beynəlxalq aləmdə öz mövqeyini möhkəmləndirməsi, qlobal problemlərin həllində fəal rol oynayan bir dövlət kimi tanınmasına təkan vermişdir.
Ramil İskəndərli
Azərbaycan Milli QHT Forumunun İdarə Heyətinin sədri
