https://innews.az/uploads/news/2024-12/_innews_8159faab8c0e7031fb7112bf9_o.jpg
"Azəriqaz" İstehsalat Birliyinin Mətbuat Xidmətinin rəhbəri Eldəniz Vəliyev innews.media açıqlamasında bildirib ki, hər il olduğu kimi bu ilin sonunda da qaz sayğaclarının limitlərinin yenilənməsi baş verəcək.
Onun sözlərinə görə, smart kart tipli sayğaclar üçün yenilənmə prosesi dekabrın 31-dən yanvarın 1-nə keçən gecə, saat 00:00-da avtomatik olaraq həyata keçiriləcək. Vəliyev qeyd edib:
"Dekabrın 31-i saat 00:00-dan sonra ödəniş edilərsə, 12 qəpikdən (1200 kub metrlik limit əsasında) hesablanacaq."
Mexaniki sayğaclar üçün isə limitlərin yenilənməsi prosesi bir qədər vaxt ala bilər və 5-6 yanvar tarixlərinə qədər uzana bilər. Bu vəziyyətin səbəbi, abonentlərin bayram günlərində evdə olmaması və ya qonaqlıqlara getməsi ilə bağlıdır.
Lakin Eldəniz Vəliyev vurğulayıb ki, bu gecikmə abonentlər üçün heç bir narahatlığa səbəb olmamalıdır:
"Hər bir abonentin 365 günlük istifadə hüququ qorunur. Əgər mexaniki sayğacların yenilənməsi yanvarın 5-də baş verirsə, abonent növbəti ilin yanvarın 5-dək həmin tarif və limitdən istifadə edə biləcək."
Bu açıqlama ilə "Azəriqaz" abonentləri limitlərin yenilənmə prosesi haqqında ətraflı məlumatlandırıb və mümkün suallara aydınlıq gətirib.
