https://innews.az/uploads/news/2025-01/_innews_0937b7d1b659446148beebe15_o.jpg
AR ETN akademik H.Ə.Əliyev adına Coğrafiya İnstitutunun Pirqulu Coğrafi Tədqiqatlar Stasionarının müdiri, aqrar üzrə elmlər doktoru Çingiz Gülalıyevin 70 yaşı tamam olub.
Çingiz Gülalı oğlu Gülalıyev 13 dekabr 1954-cü ildə Şamaxı rayonununda anadan olub. 1972-ci ildə Çarhan kənd orta məktəbini bitirərək Azərbaycan Dövlət Universitetinin fizika fakültəsinə qəbul olunub.
Ç.G.Gülalıyev 1985-ci ildə “Bəzi torpaqların istilik-elektrik xassələri” adlı namizədlik dissertasiyasını, 2016-çı ildə isə “Azərbaycanın əsas torpaq tiplərinin istilik-elektrik və hidrofiziki xassələrinin dəyişmə qanunauyğunluqları” adlı doktorluq elmi işini müdafiə edib.
Əmək fəaliyyətinə 1977-ci ildən Nüydü kənd məktəbində müəllim vəzifəsindən başlayan Ç.G.Gülalıyev hesablama maşınları üzrə baş proqramçı-mühəndis, baş laborant, mühəndis, elmi işçi kimi fəaliyyət göstərib. Azərbaycan Kosmik Tədqiqatlar İnstitutunun müvafiq laboratoriyaları ilə birlikdə müxtəlif çöl-tədqiqat işlərində iştirak edib, aerofotoşəkillər əsasında Mil düzünün şimal hissəsinin şoran torpaqlarının öyrənilməsində aerokosmik üsullarla torpaq-bioloji tədqiqat işləri aparıb, Qafqaz poliqonunda bir neçə təbii landşaftın spektr vasitəsi ilə tədqiqi işlərində iştirak edib, baş elmi işçi vəzifəsində çalışıb. 1994-cü ildən bu günədək o, Coğrafiya İnstitutunun Şamaxı rayonunda yerləşən Pirqulu biocoğrafi tədqiqatlar stasionarı şöbəsinin müdiri vəzifəsində çalışır.
Ç.G. Gülalıyevin elmi tədqiqat işləri geniş və müxtəlif istiqamətləri əhatə edir. Bu tədqiqatlar torpağın istilik-fiziki, elektrik-fiziki və hidrofiziki xassələrinin təsiredici amillərdən asılılıqlarını laboratoriya və çöl şəraitində öyrənməyə yönəlib. Bunlar eyni zamanda kəmiyyətlər arasında qarşılıqlı əlaqələrin riyazi modellərinin yaradılması, dielektrik nüfuzluğu əsasında torpağın xüsusi səth sahəsinin, elektrik keçirilməsi əmsalları əsasında nəmliyin və duzlaşma dərəcəsinin hesablanması üsullarının inkişafı, eləcə də şaquli və üfüqi elektroprofilləmə metodları vasitəsilə ərazinin xəritə-sxemlərinin tərtibi ilə bağlıdır. Bu işlərin təsərrüfat sahəsinə tətbiqi mühüm əhəmiyyət kəsb edir, çünki torpaqların əsas diaqnostik fiziki göstəricilərinin ümumiləşdirilməsi, zona üzrə kənd təsərrüfatı bitkilərinin qanunauyğunluqla paylanma perspektivlərinin araşdırılmasına xidmət edir.
Ç.G.Gülalıyev Fransa, Türkiyə, Nоrvеç, Bоlqarstan, Gürcüstan, Moskva, Banqkok və s. yerlərdə keçirilən müxtəlif elmi-praktik konfranslarda məruzələrlə iştirak edib. Onlarla qrant layihələrinin iştirakçısı və əlaqələndiricisidir. O eyni zamanda 15 adda Dövlət və beynəlxalq proqramlarda iştirak edib.
Ç.G.Gülalıyev tərəfindən 150-dən artıq elmi məqalə və tezis Azərbaycanın və müxtəlif xarici ölkələrin elmi jurnallarında və konfrans materiallarında dərc olunub. Alim 16 kitab və 1 metodik vəsaitin müəllifidir.
Çingiz müəllimi anadan olmasının 70 illiyi və zəngin elmi fəaliyyəti münasibəti ilə təbrik edir, ona sağlıqlı uzun ömür, tükənməyən enerji, yeni-yeni yaradıcılıq uğurları arzu edirik!
