https://innews.az/uploads/news/2022-09/_innews_24204f6a14a4c5c85d106221d_o.jpg
13 sentyabr 2022-ci il tarixində Azərbaycan Respublikası ilə İsrail Dövləti arasında diplomatik münasibətlərin qurulmasının 30-cu ildönümü çərçivəsində İsrail səfirliyinin təşkilatçılığı ilə “Fairmont Baku” mehmanxanasında rəsmi tədbir keçirilmişdir. İsrailin Bakıdakı səfirliyinin açılmasının ildönümü münasibətilə keçirilən tədbirdə 500-ə yaxın qonaq, o cümlədən Azərbaycanın yüksək səviyyəli dövlət və hökumət rəsmiləri, parlament üzvləri, səfirlər və bir çox başqa şəxslər iştirak edib.
İsrailin Azərbaycandakı səfiri cənab Corc Dik qonaqları salamlayaraq Azərbaycanda mövcud olan dini tolerantlıq və multikulturalizmi yüksək qiymətləndirib, iki ölkə arasında yüksək səviyyəli strateji tərəfdaşlıq əlaqələrini qeyd edib. O, ölkələr arasında çoxlu səfərlərin həyata keçirildiyini və mühüm razılaşmaların əldə olunduğunu qeyd edərək, əlavə edib: “Azərbaycanla tərəfdaşlığımız, əsasən, nazir Cabbarovun həmsədri olduğu Hökumətlərarası Birgə Komissiya sayəsində son 30 ildə nəzərəçarpacaq dərəcədə inkişaf edib”. Səfir Dik həmçinin yaxın gələcəkdə Azərbaycanın İsraildə səfirliyinin açılmasına ümid etdiyini vurğulayıb.
İqtisadiyyat naziri, eyni zamanda hökumətlərarası Birgə Komissiyanın həmsədri olan Mikayıl Cabbarov Azərbaycan hökuməti adından bildirib ki, “Biz iqtisadi əlaqələrimizin inkişafına xüsusi önəm veririk. İsrail Azərbaycanın ilk 10 ticarət tərəfdaşından biridir. İcazə verin, qeyd edim ki, cari ilin 7 ayı ərzində statistik məlumatlara görə, ticarət dövriyyəmiz iki dəfədən çox artıb”.
Tədbirin mədəniyyət hissəsində bakılı israilli musiqiçi Kama Kamilanın Azərbaycan və İsrail irsini özündə birləşdirən canlı ifası olub. Bundan əlavə, əlilliyi olan insanlar üçün paltar tikən İsrail və Azərbaycan dizaynerlərinin işlərini nümayiş etdirən xüsusi moda nümayişi keçirilib. Bu, İsrail və Azərbaycan arasında moda sahəsində ilk əməkdaşlıqdır. 20 əlilliyi olan model səhnəyə çıxaraq tamaşaçılara bu xüsusi layihənin dəbli nəticələrini nümayiş etdirib.
Tədbir boyu qonaqlar İsraildən xüsusi dəvət olunmuş məşhur israilli aşpaz Michael Katzın xüsusi olaraq hazırladığı unikal yeməklərdən dadıblar. Yeməklər İsrailin milli mətbəxinin nümunələri olub.
Xatırladaq ki, Azərbaycan ilə İsrail arasında diplomatik əlaqələr 1992-ci il aprelin 7-də qurulub, İsrailin Bakıda səfirliyi isə 1993-cü il avqustun 29-da açılıb.
