“Sən Kifayətlisən” - Portret Sərgisi

2018-ci ildə baş tutan “Qadınlar və Hisslər” sərgisindən sonra bu yeni layihənin ideyası mənimlə birlikdə yaşamağa başladı. Aradan keçən illər ərzində apardığım saysız-hesabsız araşdırmalar, etdiyim söhbətlər, müsahibələr və dərin düşüncələr məni bu gün təqdim etdiyim əsərlərə gətirib çıxardı.

“Sən Kifayətlisən” adlı bu sərgidə 20 ədəd akril boyalı portret nümayiş olunur. Bütün əsərlər 90x110 sm ölçüsündədir. Yaradıcılığım boyu ekspressionizm mənim əsas ilham mənbəyim olub və insan ruhunun dərinliklərində gizlənən duyğuları ifadə etməyə çalışmışam.

Bu sərginin ideyası, müasir dünyanın yaratdığı sonsuz müqayisələrə, süni gözəllik filtrlərinə, cəmiyyətin, ailənin və insanın özünün formalaşdırdığı təzyiqlərə bir cavabdır. Sosial media, ətrafımızdakılar və daxili səslər bizə daim təlqin edir: daha yaxşı ol, daha gözəl görün, daha çox nailiyyət qazan...

Mən isə bu portretlər vasitəsilə daha sakit, səmimi bir səslə demək istəyirəm:

Sən kifayətlisən.
Olduğun halınla gözəlsən.
Sən bacarıqlısan, sən dəyərlisən.

Bəli, inkişaf əhəmiyyətlidir, lakin daxili dəyərinə heç vaxt şübhə etmə.

Ümid edirəm ki, bu portretlərə baxan hər bir insan, öz bənzərsiz və dəyərli varlığını bir daha hiss edəcək.