https://innews.az/uploads/news/2025-05/_innews_424d98097f6330ec5a6bdb2d0_o.jpg
28 May – Müstəqillik Günü və “Konstitusiya və Suverenlik İli” ilə əlaqədar Kolumbiyanın paytaxtı Boqota şəhərində təntənəli qəbul mərasimi keçirilib. Tədbirdə Kolumbiyanın dövlət və hökumət nümayəndələri, konqresmenlər, bu ölkədə fəaliyyət göstərən akademik dairələr və diplomatik korpusun üzvləri, yerli KİV və Azərbaycan icmasının təmsilçiləri iştirak ediblər.
İki ölkə arasındakı dostluq əlaqələrinin təcəssümü kimi, Kolumbiya tərəfi tədbirin qonaqlarının qarşılanması üçün Prezident Qvardiyasının protokol əsgərlərini ayırıb, o cümlədən hər iki ölkənin himnləri Qvardiyanın musiqiçiləri tərəfindən canlı ifa edilib.
Ölkəmizin Kolumbiyadakı səfiri Məmməd Talıbov tədbiri giriş sözü ilə açaraq, Şərqdə ilk dünyəvi və demokratik respublika olan Azərbaycan Xalq Cumhuriyyətinin müstəqilliyinin elan edilməsinin zəngin dövlətçilik tariximizdə tutduğu əhəmiyyətli rolu qeyd edib, müstəqilliyini bərpa etdikdən sonra qarşılaşdığı çoxsaylı çətinliklərin öhdəsindən layiqincə gələrək, bu gün Azərbaycanın suveren, firavan və inkişaf etmiş bir ölkə olaraq beynəlxalq aləmdə yüksək nüfuz və söz sahibinə çevrildiyini vurğulayıb.
2025-ci ilin “Azərbaycan Respublikasında Konstitusiya və Suverenlik İli” elan edilməsinin əsasları barədə məlumat verən diplomat, ölkəmizin sülh gündəliyinə hər zaman sadiq qaldığına diqqət çəkib, eləcə də regionda dayanıqlı və dönməz sülhün əldə edilməsi üçün beynəlxalq ictimaiyyətin Ermənistanı əməli addımlar atmağa çağıracağına ümid etdiyini bildirib.
Səfir Ermənistanın mina terroru fonunda öz doğma torpaqlarından didərgin salınmış insanların layiqli və təhlükəsiz qayıdışının təmini məqsədilə Azərbaycan Hökuməti tərəfindən həyata keçirilən genişmiqyaslı bərpa-quruculuq işlərindən bəhs edib, ölkəmizin Avropanın enerji təhlükəsizliyində artan roluna toxunmaqla yanaşı, son illərdə enerji keçidi, iqlim dəyişikliyi ilə mübarizə və yaşıl enerjinin ixracı üzrə əldə etdiyi nəzərəçarpan nailiyyətlərdən söz açıb. COP29-un ən uğurlu COP-lardan biri kimi tarixə düşdüyünə diqqət çəkib, konfransın yekununda əldə olunmuş müsbət nəticələrə toxunub.
M.Talıbov Azərbaycan-Kolumbiya münasibətlərinin inkişafında müşahidə olunan müsbət dinamikanın məmnunluq doğurduğunu bildirib, mədəniyyət, təhsil, humanitar, iqlim dəyişikliyi və ətraf mühitin mühafizəsi başda olmaqla bir çox istiqamətlər üzrə, o cümlədən iki ölkənin qanunvericilik orqanları arasında səmərli əməkdaşlıq əlaqələrinin qurulduğunu diqqətə çatdırıb. Diplomat iki ölkə arasındakı qarşılıqlı faydalı əməkdaşlıq əlaqələrinin bundan sonra da inkişaf edəcəyinə əminliyini ifadə edib, Kolumbiyanın aidiyyəti dövlət qurumlarına, xüsusilə Silahlı Qüvvələrə tədbirin təşkili ilə əlaqədar nümayiş etdirdikləri dostluq jestinə görə minnətdarlığını ifadə edib.
Daha sonra çıxış edən Kolumbiya Xarici İşlər Nazirliyinin Avropa idarəsinin rəisi, səfir Patrisiya Kortes ölkəmizin Müstəqillik Günü ilə əlaqədar Azərbaycan Respublikasına və xalqına səmimi təbriklərini çatdırıb, iki ölkə arasındakı əməkdaşlıq əlaqələrinin müxtəlif sahələr üzrə gündən-günə daha da gücləndiyini vurğulayıb. O, ölkəmizin COP29 kimi mötəbər beynəlxalq tədbirə yüksək səviyyədə ev sahibliyi etdiyini bildirib, əlverişli geostrateji mövqeyə malik olan Azərbaycanın yürütdüyü uğurlu xarici siyasətin onu bütün dünya, eləcə də Latın Amerikası ölkələri üçün etibarlı tərəfdaşa çevirdiyini qeyd edib.
Kolumbiyalı diplomat iki ölkə arasında mövcud olan fəal siyasi diyaloqun və təmasların ikitərəfli əməkdaşlığın genişləndirilməsinə əlavə imkanlar yaratdığını bildirib, 2024-cü ildə iqlim dəyişikliyinin təsirlərinin aradan qaldırılması məqsədilə Azərbaycan Hökuməti tərəfindən ölkəsinə humanitar yardımların ayrılmasına görə bir daha minnətdarlıqlarını çatdırıb.
Sonda Azərbaycanın Müstəqillik Günü ilə əlaqədar, o cümlədən ölkəmizin turizm imkanlarını əks etdirən tanıtım videoçarxları nümayiş etdirilib, milli mətbəximizin ləziz təamları qonaqlara təqdim olunub.
