https://innews.az/uploads/news/2025-06/_innews_6e7ed7b1a5eee9fa575f3aec3_o.jpg
Bakıda keçirilən Birinci Beynəlxalq Kredit Hesabatlılığı Konfransında Azərbaycan Mərkəzi Bankının nümayəndəsi Toğrul Əliyev açılış nitqi ilə çıxış edib. Konfrans “Məlumatdan Qərarlara: Kredit Bürolarının Gələcəyi” mövzusuna həsr olunub.
Toğrul Əliyev qeyd edib ki, müasir dövrdə kredit bürolarının funksiyası təkcə kredit skorinqi ilə məhdudlaşmır – bu qurumlar maliyyə sabitliyi, risklərin idarə olunması və maliyyə inklüzivliyinin genişləndirilməsi sahələrində əsas alətlərdən birinə çevrilib.
O bildirib ki, kredit bazarlarında informasiya assimetriyasının azaldılması, məsuliyyətli kreditləşmə, alternativ məlumatların (kommunal ödənişlər, elektron ticarət davranışları və s.) inteqrasiyası kredit əlçatanlığını artırır. Eyni zamanda, rəqəmsallaşma və məsafədən xidmətlər fonunda kredit büroları şəxsiyyətin identifikasiyası və rəqəmsal müştəri uyğunluğu baxımından da mühüm rol oynayır.
Toğrul Əliyev süni intellekt və maşın öyrənməsi texnologiyalarının kredit qərarlarına təsirini yüksək qiymətləndirərək, bu sahədə nəzarət və şəffaflıq çağırışlarının da mövcud olduğunu vurğulayıb.
Azərbaycan Kredit Bürosunun fəaliyyəti və ölkənin Dünya Bankının “B-Ready” hesabatındakı mövqeyi də çıxışda xüsusi qeyd edilib. Sonda, tədbir çərçivəsində ACİP Assosiasiyasının İdarə Heyətinin iclasının da keçirilməsi konfransın strateji əhəmiyyətini daha da artırıb.
