https://innews.az/uploads/news/2025-06/_innews_b5e0355e3af9f708bb11d53d9_o.jpg
Azərbaycanın bank sektoru son illərdə güclü inkişaf mərhələsinə qədəm qoyub.
innews.media xəbər verir ki, bu barədə Azərbaycan Banklar Assosiasiyasının (ABA) prezidenti Zakir Nuriyev Bakıda keçirilən Birinci Beynəlxalq Kredit Hesabatlılığı Konfransında danışıb.
Zakir Nuriyev bildirib ki, 2024-cü ildə ölkədə bank sektorunun ümumi aktivləri 53 milyard manata çatıb. Bu rəqəm 2018-ci illə müqayisədə təxminən 80 faiz artım deməkdir. Kredit portfeli isə daha da sürətli artaraq son 7 ildə 125 faiz böyüyüb və 29,3 milyard manata yüksəlib.
ABA rəhbəri çıxışı zamanı problemli kreditlərlə bağlı da müsbət tendensiyalara toxunub: “Vaxtı keçmiş kreditlərin həcmi 2018-ci illə müqayisədə 72 faiz azalıb və bu göstərici hazırda 449 milyon manat təşkil edir”.
Zakir Nuriyev vurğulayıb ki, bu rəqəmlər təkcə iqtisadi artımı deyil, eyni zamanda sektorun sağlamlaşdığını və risklərin daha effektiv idarə olunduğunu nümayiş etdirir.
