https://innews.az/uploads/news/2025-06/_innews_9b5d1f5fe998c3bfad1b8efaa_o.jpg
“Azərbaycan hər zaman dialoqa, dinc birgə yaşayışa və beynəlxalq əməkdaşlığa dövlət səviyyəsində böyük əhəmiyyət verir”.
Bu fikri Milli Məclisin sədri Sahibə Qafarova bu gün Bakıda keçirilən Qara Dəniz İqtisadi Əməkdaşlıq Təşkilatı Parlament Assambleyasının 65-ci Baş Assambleyasında çıxışı zamanı səsləndirib. Onun sözlərinə görə, bu gün Bakı ideyaların yarandığı, təcrübə mübadiləsinin aparıldığı, birlikdə regionumuzu yaxşılığa doğru dəyişə biləcək həll yollarının axtarıldığı yerə çevrilir.
Spiker Sahibə Qafarova diqqətə çatdırıb ki, ölkəmiz real və hərtərəfli uğur əldə etmək üçün öz təcrübəsini və imkanlarını bölüşür. O, deyib ki, bu gün Azərbaycanın təşəbbüsü ilə həyata keçirilən enerji layihələri və strateji boru kəmərləri regionun və onun sərhədlərindən kənarda enerji təhlükəsizliyində əvəzsiz rol oynayır. Bununla yanaşı, Milli Məclisin sədri diqqətə çatdırıb ki, nəqliyyat infrastrukturuna qoyulan böyük investisiyalar Azərbaycanı Avrasiyanın mühüm nəqliyyat qovşaqlarından birinə çevirib, Orta Dəhliz boyunca Şərqlə Qərb arasında həyati və etibarlı əlaqəni təmin edib.
Onun sözlərinə görə, Xəzər-Qara dəniz-Avropa Yaşıl Enerji Dəhlizinin inkişafı üzrə layihələr Xəzərin böyük yaşıl enerji ehtiyatlarının Avropaya ixracına imkan yaradacaq, ölkələrimizin yaşıl inkişaf gündəliyinə töhfə verəcək.
