https://innews.az/uploads/news/2025-06/_innews_351499e2c679bca9b5c408974_o.jpg
Azərbaycan Mərkəzi Bankı və Azərbaycan Banklar Assosiasiyasının birgə təşkilatçılığı ilə “Fintex Sammiti 2025” tədbiri öz işinə başlayıb. İki gün davam edəcək sammit çərçivəsində rəqəmsal maliyyə sektorunun inkişafı, müasir bank xidmətləri, kibertəhlükəsizlik, rəqəmsal valyutalar və digər aktual mövzular ətrafında geniş fikir mübadiləsi aparılır.
Tədbirin açılış mərasimində çıxış edən Azərbaycan Mərkəzi Bankının sədr müavini Vüsal Xəlilov qeyd edib ki, rəqəmsal transformasiya şəraitində maliyyə texnologiyaları şirkətləri sektorda getdikcə daha önəmli rol oynamağa başlayır.
O, bu sahədə aparılan islahatlara toxunaraq vurğulayıb ki, tənzimləmə və nəzarət çərçivələrinin təkmilləşdirilməsi, innovativ texnoloji həllərin tətbiqi və insan kapitalının inkişafı sektorda inklüziv və dayanıqlı ekosistemin formalaşdırılması baxımından mühüm əhəmiyyət daşıyır.
“Maliyyə sektorunda uğurlu inkişafın əsas şərtlərindən biri – geniş əməkdaşlıq və açıq dialoq mühitidir. Bu yanaşma həm yerli, həm də beynəlxalq səviyyədə sektorun dayanıqlığını və innovativliyini təmin edir,” – deyə sədr müavini qeyd edib.
Sammitdə yerli maliyyə institutlarının rəhbərləri, texnologiya mütəxəssisləri və beynəlxalq ekspertlər bir araya gələrək fintex sahəsində qlobal trendləri, rəqəmsal valyuta layihələrini, kibertəhlükəsizlik mexanizmlərini və müasir bank məhsullarını dəyərləndirirlər.
