“8 Noyabr” Elektrik Stansiyasının gücü 1880 meqavata çatdırılıb

“8 Noyabr” Elektrik Stansiyasının gücü 1880 meqavata çatdırılıb “8 Noyabr” Elektrik Stansiyasının gücü 1880 meqavata çatdırılıb https://innews.az/az/news/id-49888

“Azərenerji” ASC-yə məxsus “8 Noyabr” Elektrik Stansiyasının ümumi generasiya gücü 1880 meqavata çatdırılıb.

Bu barədə “Azərenerji” ASC-nin İstehsal İdarəsinin xidmət rəisi Müşfiq Abuzərli stansiyada jurnalistlərə açıqlama verərkən bildirib.

Onun sözlərinə görə, cəmi iki il ərzində istifadəyə verilən bu stansiya ən müasir texnologiyalar tətbiq olunmaqla inşa edilib:

“Sınaq-sazlama işlərinə 2023-cü ilin dekabr ayında başlamışıq və artıq 2024-cü ilin aprel ayında bütün prosesləri tamamlamışıq. Hazırda stansiya tam istismardadır.”

M.Abuzərli qeyd edib ki, stansiyada dörd qaz turbini qurğusu quraşdırılıb. Hər biri 320 meqavat gücündə olan bu turbinlərə 400 ton məhsuldarlığa malik buxar qazanları birləşdirilib. Qazanlardan alınan buxar isə 300 meqavatlıq mövcud buxar turbinlərinə ötürülərək elektrik enerjisinin istehsalında istifadə olunur.

“Bu kombinə edilmiş sxem nəticəsində stansiyanın ümumi generasiya gücü 1880 meqavata çatdırılıb,” – deyə o əlavə edib.

Xidmət rəisi həmçinin yeni və köhnə texnologiyalar arasında yanacaq sərfiyyatı baxımından ciddi fərq olduğunu vurğulayıb:

“Köhnə texnologiyada 1 kilovat-saat enerji istehsalı üçün 335 qram şərti yanacaq sərf olunurdusa, yeni sistemdə bu göstərici 225 qramadək azaldılıb. Bu da ildə təqribən 1,2 milyard kubmetr zərərli qazın atmosferə atılmasının qarşısını alır.