https://innews.az/uploads/news/2025-07/_innews_159081f46eaa25d0a5878b044_o.jpg
Azərbaycan Milli Mətbuatının 150 illiyi münasibətilə “AzərEnerji” ASC tərəfindən ölkənin ən iri enerji obyekti – “8 Noyabr” Elektrik Stansiyasına mediatur təşkil olunub.
Mingəçevirdə keçirilən səfərdə müxtəlif media qurumlarını təmsil edən jurnalistlər iştirak edib. Turun əsas məqsədi həm mətbuat nümayəndələrinin enerji sektoru ilə bağlı bilgilərini artırmaq, həm də ölkənin enerji mərkəzi olan Mingəçevirdə Milli Mətbuat Gününü qeyd etmək olub.
Cəmi iki ilə inşa edilən stansiya – rekord göstərici
Verilən məlumata görə, Prezident İlham Əliyevin 2023-cü ildə təməlini qoyduğu və 2025-ci il iyunun 24-də istismara verilən “8 Noyabr” Elektrik Stansiyası cəmi iki il ərzində tikilərək ölkənin enerji sisteminə inteqrasiya edilib. Stansiyanın generasiya gücü 1880 meqavat təşkil edir ki, bu da Azərbaycan enerji tarixində yeni mərhələ deməkdir.
İnfrastrukturun miqyası: minlərlə ton material, beynəlxalq əməkdaşlıq
Tikinti zamanı:
15 min kubmetrdən artıq svaylar vurulub,
7200 ton metal konstruksiya işləri yerinə yetirilib,
Layihəyə İtaliya, Çin, İspaniya, Türkiyə və digər ölkələrdən olan mütəxəssislərlə yanaşı, 2500 yerli mütəxəssis cəlb olunub.
Stansiyanın qazla dayanıqlı təchizatı üçün 10 km uzunluğunda, 1000 mm diametrli yeni qaz xətti çəkilib, iki qaz paylayıcı və tənzimləyici stansiya ilə yanaşı müstəqil kompressor qurğuları da quraşdırılıb.
İnteqrasiya və genişlənmə işləri paralel aparılıb
Stansiyanın enerji sisteminə inteqrasiyası üçün Mingəçevirdəki “Azərbaycan” İES-in 500 və 330 kV-luq yarımstansiyaları tamamilə yenidən qurulub. Bununla yanaşı:
65,6 km uzunluğunda 500 kV-luq “Mingəçevir–Samux” ötürmə xətti inşa olunub,
“Samux” yarımstansiyasında da genişmiqyaslı yenidənqurma işləri aparılıb.
Həmçinin “Azərbaycan” İES-in mövcud 7-ci və 8-ci enerji bloklarının buxar turbinləri zəmanətli əsaslarla modernləşdirilib, bu da sistemin ümumi effektivliyini artırıb.
Az vəsait, yüksək nəticə
Məlumatda xüsusilə qeyd olunub ki, bu stansiyanın inşasına dünya analoqları ilə müqayisədə bir neçə dəfə az vəsait sərf olunub, bu isə layihənin həm iqtisadi, həm də texnoloji baxımdan səmərəli olduğunu göstərir.
