https://innews.az/uploads/news/2022-10/_innews_b97af63a8d574e0639385a9cb_o.jpg
Azərbaycan Respublikasının Polşa Respublikasındakı Səfirliyi, Azərbaycan Respublikasının Mədəniyyət Nazirliyi və Polşa Kinematoqrafçılar Assosiasiyasının birgə təşkilatçılığı ilə 26 sentyabr 2022-ci il tarixində Varşava şəhərində Azərbaycan filmləri həftəsinin açılışı keçirilmişdir.
Azərbaycan kinematoqrafiyası ilə tanış olmaq üçün unikal şans olaraq görülən həftə 1 oktyabr tarixinədək Varşavanın “Kultura” kinoteatrında davam edəcək və hər bir film polyak və ingilis dillərində subtitrlərlə tamaşaçılara təqdim olunacaq.
Qonaqlar tərəfindən maraqla qarşılanan Azərbaycan kino həftəsinin açılışında ölkədəki diplomatik missiyaların rəhbər və əməkdaşları, ölkədəki dini konfessiyaların təmsilçiləri, millət vəkilləri mədəniyyət və incəsənət xadimləri, işgüzar dairələrin nümayəndələri, vətəndaş və soydaşlarımız iştirak etmişdir.
Polşa Kinematoqrafçılar Assosiasiyasının vitse-prezidenti xanım Kinqa Dembska açılış mərasimində çıxış edərək kino həftəsinin əhəmiyyətindən söz açmış və polyak kinosevərlərə tamaşaçılar tərəfindən böyük rəğbət qazanmış filmlərin təqdim olunacağını bildirmişdir.
Azərbaycanın Polşadakı səfiri Nərgiz Qurbanova Azərbaycan kinosunun tarixindən danışaraq ölkəmizin mədəni həyatında onun özünəməxsus rolunu qeyd etmişdir. Səfir bildirmişdir ki, Fransadan olan Lümyer qardaşları 1895-ci ildə kinofilmlər çəkmək üçün yeni aparat icad edib patentləşdirdikdən cəmi üç il sonra 1898-ci ildə fransız sahibkar, fotoqraf və operator Aleksandr Mişon Azərbaycanda film çəkməyə başlamışdır. Onun ilk filmi 1898-ci ilin 2 avqust tarixində çəkildiyi üçün hər il avqustun 2-i Azərbaycan Kinosu Günü kimi qeyd olunur.
Əlavə olunmuşdur ki, 1916-cı ildə Pirone qardaşları Azərbaycanda kinematoqrafiyanı istehsalat sənayesinə çevirəndə Azərbaycan kino sənayesi, xüsusilə “Arşın mal alan” komediyası ilə daha da inkişaf etmişdir. Azərbaycan filmləri təkcə yerli auditoriya üçün deyil, həm də xarici kinosevərlər tərəfindən rəğbətlə qarşılanmışdır. 1935-ci ildə rejissorlar Boris Barnet və Səməd Mərdanov ölkədə ilk səsli film olan “Mavi dənizin sahilində” filmini çəkmişlər. Daha sonra bu film dünya kinosunun 100 illiyi ilə bağlı ən nüfuzlu kino tənqidçiləri arasında keçirilən sorğuya əsasən dünya kinosunun ən yaxşı filmləri siyahısına daxil edilmişdir. Səfir çıxışında Azərbaycan kinosunun ən uğurlu filmlərindən söhbət açaraq milli kino sənətinin inkişafı üçün həyata keçirilən mühüm işləri diqqətə çatdırmışdır.
Daha sonra Mazovietski əyalətinin marşalı Adam Strujikin adından təbrik məktubu oxunmuşdur. Varşava Baş Yeparxiyasının köməkçi yepiskopu Yepiskop Mixal Yanoxa isə öz çıxışında Azərbaycanda olan multikuturalizm mühiti və ölkəmizin kino tarixi haqqında öz təəssüratlarını bölüşmüşdür.
Sonuncu olaraq, rejissor Fariz Əhmədov və filmin ərsəyə gəlməsində birlikdə çalışdığı polyak operator Mateuş Çuxnovski qonaqlara xitab etmişlər. Qeyd edək ki, Azərbaycan kino həftəsinin açılışında istedadlı azərbaycanlı rejissor Fariz Əhmədovun rejissoru olduğu “Sonuncu” adlı sənədli film nümayiş olunmuşdur. Bu film rejissor Fariz Əhmədov və polyak operator Mateuş Çuxnovski arasında uğurlu əməkdaşlıq nəticəsi hesab olunur.
Azərbaycan kino həftəsinin növbəti günlərində “Biz”, “Daxil ada”, “Miras” və digər filmlər polyak kinosevərlər üçün tamaşaya qoyulacaq.
