https://innews.az/uploads/news/2025-08/_innews_8b3c3a852cc80616aa11b787c_o.jpg
Saxta xəbərlər, informasiya manipulyasiyası məhvedici virus kimi yayılıb. Bunu edənlər ictimai şüurun taleyini satmaqdan çəkinməyən, reytinq uğruna “dəyərlərini” itirmiş bir nəsildir.
Bu yolla reytinq qazananlar, sosial mediada “trend” olanlar, həqiqəti yox, sensasiyanı önə çıxaranlar artıq bir peşə sahibləri kimi fəaliyyət göstərir. Reytinq uğrunda özünü alçaldan “jurnalist”lərə, blogerlərə, sosial media “ulduzlarına” bir mesaj vermək lazımdır: Siz insanlara xəbər vermirsiniz, siz insanlara zəhər paylayırsınız. Həqiqəti ayaqlar altına atıb, başlığı qərəzli yazıb camaatın beyni ilə oynayırsınız. Hədəfiniz nədir? Reytinq? Görüntü? Qəpik-quruşlu reklam müqaviləsi?
Bu cəmiyyətin faciələri, insanların ölümləri, ağrıları sizin üçün kontentdir. Uşağını itirən ana, intihar edən bir gənc, dağılan ailələr sizin üçün yalnız klik, izlənmə, bəyənmə, reklam dəyəridir. Ən pis cəlladlar qılıncla öldürmür, yalanla öldürür, və siz bu cəmiyyətin ən qorxunc cəlladlarısınız. Bu gün xəbərlər faktlardan yox, fantaziyalardan hazırlanır. Medianın misiyası cəmiyyətin gözünü açmaqdır, amma siz gözə kül üfürürsünüz. Ən qorxulusu isə budur: artıq insanlar gerçəklə yalanı ayırd edə bilmir və bunda sizin payınız az deyil. Düz yazan bir jurnalist, vicdanlı paylaşım edən bir insan yüzlərlə yalan səsin içində ən güclü səs olur. Çünki bu peşədə qalıcı olanlar – trendləri yox, etibarı seçənlərdir.
Reytinq ötüb keçir, vicdan qalır. Sonda təkcə kim nə qədər izlənmə aldı, kim “trendlərdə” idi, heç kimin vecinə olmayacaq. Əsl peşəkarlıq vicdanla yazmaq və obyektiv olmaqdır.
Fidan İbrahimli
