https://innews.az/uploads/news/2025-08/_innews_0260c46bf6a98b7f8120d2ef6_o.jpg
07 avqust 2025-ci il tarixində Dövlət Tibbi-Sosial Ekspertiza və Reabilitasiya Agentliyi (DTSERA) tərəfindən eşitmə məhdudiyyətli şəxslərlə çalışan təşkilatlar üçün “Səsiniz olaq” surdotərcümə xidməti və onlayn-müraciət xidməti mövzusunda maarifləndirici onlayn görüş təşkil olunub.
"innews media" xəbər verir ki, layihə haqqında iştirakçılara DTSERA şöbə müdiri Nicat Abbasbəyli və layihənin koordinatoru Pərvin Süleymanova ətraflı məlumat veriblər. Görüş zamanı xidmətin əsas məqsədləri – eşitmə və nitq məhdudiyyəti olan şəxslərlə cəmiyyətin digər üzvləri arasında ünsiyyət maneələrinin aradan qaldırılması, informasiya mübadiləsinin təmin olunması və inklüziv mühitin dəstəklənməsi vurğulanıb. Tədbirin surdotərcüməsini isə Rəhilə Babayeva həyata keçirib.
Tədbirdə “Eşitmə və Nitq Məhdudiyyətli Şəxslərə Sosial Yardım” İctimai Birliyi də iştirak edib. Təşkilatın sədri Cəmilə Abdulova layihənin ideya müəllifinə və bütün komandasına təşəkkürünü bildirib, xidmətin daha geniş kütləyə çatdırılması və davamlılığının təmin olunması istiqamətində öz təkliflərini səsləndirib.
Cəmilə Abdulova çıxışında bildirib ki, “Səsiniz olaq” surdotərcümə xidməti eşitmə məhdudiyyəti olan şəxslər üçün vacib bir layihədir. Bu təşəbbüs onların müxtəlif xidmət sahələrinə çıxışını asanlaşdıraraq, qarşılaşdıqları ən böyük maneəni – ünsiyyət baryerini aradan qaldıracaq. İllərdir təşkilatımıza eşitmə məhdudiyyəti olan şəxslərdən dövlət qurumlarında, bank sektorunda, notarius, səhiyyə müəssisələrində və digər xidmət nöqtələrində tərcüməçi dəstəyi ilə bağlı çoxsaylı müraciətlər daxil olurdu. Lakin zaman və imkan məhdudiyyətləri səbəbindən bütün müraciətləri operativ şəkildə təmin etmək həmişə mümkün olmurdu.
Bu xidmətin dövlət səviyyəsində tanınması və davamlı fəaliyyət göstərməsi isə eşitmə məhdudiyyətli şəxslər üçün bütün sahələrdə bərabər və maneəsiz çıxış imkanı yaradacaq. Bu, sadəcə texniki bir xidmət deyil – onların öz sözlərini cəmiyyətə çatdırması, hüquqlarından tam istifadə etməsi və özlərini dəyərli və bərabər hiss etməsi üçün atılmış mühüm bir addımdır. Bu addım təşkilatımızın illərdir səsləndirdiyi “Səssizliyin səsi olaq!” şüarına daha bir dəstək olaraq, inklüziv gələcək üçün bir addım da atıldı!”
Belə təşəbbüslər eşitmə məhdudiyyətli şəxslərin informasiya və ünsiyyət imkanlarını genişləndirməklə onların cəmiyyətə tam inteqrasiyasına mühüm töhfə verir.
