Dostluğun ən saf üzü

Dostluğun ən saf üzü Dostluğun ən saf üzü https://innews.az/az/news/id-50873

Həyatda insanın yolunu işıqlandıran, ən çətin anında əlindən tutan, sevinci ilə sevindirən, kədəri ilə kədərləndirən insanlar var. Onlar sadəcə “dost” deyil – ruhunun sirdaşı, həyatının şahidi, ömrünün ən gözəl parçalarından biridir. Belə dostluqlar nə zaman, nə məsafə tanıyır; nə pula, nə də mənsəbə bağlıdır. Onlar saf duyğularla, qarşılıqsız sevgi və hörmətlə böyüyür, illər keçdikcə daha da dəyər qazanır.

Bəzən bir dostun varlığı belə yetər ki, bütün dərdlərin yükü yüngülləşsin, bütün çətinliklər asan görünsün. Onun gülüşü bahar kimi içini isidər, səsi hüzur gətirər, varlığı isə sənə yaşadığını hiss etdirər. Çünki dostluq – həyatın ən gözəl hədiyyəsidir və onu qorumaq, yaşatmaq, dəyərini bilmək insanın ən böyük xoşbəxtliyidir.

Bu şeir, məhz belə bir dostluğun hekayəsidir – hər misrasında sevgi, minnətdarlıq, sədaqət və əbədi bağlılıq gizlənib. Bu şeirim hazırda həyatımda olan və bir ömür olmasını istədiyim Aysuya həsr olunur.

Dostum

Gəldin, gəlişinlə çiçəklər açdı,
Baharı gətirdin ömrümə, dostum.
Yox oldu bir anda bütün dərdlər,
Ürəyim öyrəndi vurmağı, dostum.

Sənsən hər dərdimə dərman olanım,
Qəlbin dərinliyində yer salanım,
Ən gözəl anlara ortaq olanım,
Birlikdə yazırıq bir ömür, dostum.

Deməsəm də halımdan anlayansan,
Hər dərdimi özününkü sanansan,
Təsəlli verib əlimdən tutansan,
Könlümün hüzuru tək sənsən, dostum.

Üzülsən çiçəktək solub gedərəm,
Gül deyə ömrümü qurban verərəm,
Milyonlar içindən səni seçərəm,
Ruhumun həmdəmi bil sənsən, dostum.

Varlığın ömrümə bir hədiyyədir,
Yaşanacaq illər hələ öndədir,
Gülüşün mənim üçün cənnətdir,
Ona görə hər şey qurbandır, dostum.

Sən gülüncə mən də sevinc tapıram,
Səninləykən qəmi də unuduram,
Hər gün dualara səni qatıram,
Ki, Allahım qorusun səni, dostum.

Canımı istəsən verərəm qurban,
Yetər ki, bəxtimə yazıl hər zaman,
Mənəm qəlbinə və özünə heyran,
Sən mənim işığım, nurumsan, dostum.

Ol, ömrümün hər an gözəl qonağı,
Bu dostluğun çatsın dizə sorağı,
Olaram sənin könlünün dayağı,
Bir ömür yaşarsan qəlbimdə, dostum.

Yolların açıq, uğurun bol olsun,
Gül ki, gülüşlərində kədər solsun,
Həyatın da, qəlbin də eşqlə dolsun,
Sən mənim sevgim, evimsən, can dostum.

Aysel Aslanova