https://innews.az/uploads/news/2025-08/_innews_bffa56a8d61d3522def827ff1_o.jpg
Həyat hər birimiz üçün öz çətinlikləri, sınaqları və dərsləri ilə doludur. Xüsusilə bir qız uşağı üçün dünya həm gözəlliklərlə, həm də sınaqlarla doludur. Bəzən insanlar sözləri ilə aldatmağa, üzləri ilə gizlətməyə çalışar, xəyanət və yalanlar içində həyat yolunu daha da mürəkkəb edə bilər.
Bu şeir, bir valideynin qızına həyatın çətinliklərinə qarşı necə güclü olmalı olduğunu, özünü sevməyi, hörmətini qorumağı və saf duyğularını itirməməyi öyrətmək istəyindən doğub. Burada hər misra bir xəbərdarlıq, hər bənd isə dərin bir sevgi və qayğı ilə doludur.
Qızım
Həyat yolu çətin olar bilirəm,
Bəlkə də, bu səni çox yorar qızım.
Könlün aldanmasın hər gülən üzə,
Qoy, hər kəs bilməsin, sirrini, qızım.
Dünyada çoxdur yalanlar, oyunlar,
Şirin söz deyənlər hər zaman varlar,
Xəyanət içində yanan vicdanlar,
Onların odundan uzaq dur, qızım.
Əvvəl özünü sev, ol öz sahibin,
Qoru hər zaman özün öz hörmətin,
Başını da əymə, qırma qeyrətin,
Bir günlük sevgiyə aldanma, qızım.
Hər üzünə gülən kəsə dost demə,
Özgə birini özündən çox sevmə,
Saflığını heç vaxt çevirmə yemə,
Dünyanın oyununa gəlmə, qızım.
Nə qədər yorulsanda dayanma sən,
Ümidin işığını söndürmə sən,
Saxta sevgini qəlbinə alma sən,
Qaranlıq dünyamıza nur saç, qızım.
Yalançı insana könlünü vermə,
Xəyanət görəndə qəlbini silmə,
Könül almayanın qəlbində itmə,
Gedənə qapını göstər sən, qızım.
Canımda can olduqca yanındayam,
Nə etsən də mən sənin arxandayam,
Ölsəm belə düşün ki, canındayam,
Özüm olum özünə qurban, qızım.
Xoşbəxtliyini görmək böyük arzum,
Sənsən mənim evim, eşiyim, yurdum,
Qoymaram mən səni nədənsə məhrum,
Sonsuzadək səni sevəcəm, qızım.
Aysel Aslanova
