Ali məktəblərin boş qalan plan yerlərinə qəbulun nəticələri açıqlandı

Ali məktəblərin boş qalan plan yerlərinə qəbulun nəticələri açıqlandı Ali məktəblərin boş qalan plan yerlərinə qəbulun nəticələri açıqlandı https://innews.az/az/news/id-51579

Ali təhsil müəssisələrinin boş qalan plan yerlərinə və tam (11 illik) orta təhsil bazasında orta ixtisas təhsili müəssisələrinə qəbulun nəticələri açıqlanıb.

Dövlət İmtahan Mərkəzindən (DİM) verilən məlumata görə, abituriyentlər və subbakalavrlar nəticələrini DİM-in internet saytından, həmçinin mobil operatorlar (Azercell, Bakcell, Nar) vasitəsilə “iş nömrəsi”ni və ya “7 rəqəmli kod”u 7727-yə göndərməklə öyrənə bilərlər.

Müsabiqədə iştirak etmək üçün 22237 nəfər ixtisas seçimi edib. Nəticədə ali məktəblərin boş qalan plan yerlərinə 246 nəfər (o cümlədən 126 nəfər subbakalavr), orta ixtisas təhsili müəssisələrinə isə 15662 nəfər qəbul olub.

Tam orta təhsil bazasında orta ixtisas təhsili müəssisələrinə qəbulun nəticələrinə əsasən, plan yerləri 98.66% dolub. Cəmi 212 yer (1.34%) boş qalıb.

Ali məktəblərin boş qalan yerlərinə qəbul olanların siyahısı sentyabrın 4-də “Abituriyent” jurnalının 8-ci, orta ixtisas təhsili müəssisələrinə qəbul olanların siyahısı isə 9-cu sayında elektron (pdf) formatda dərc ediləcək.

Qəbul olan abituriyentlər (subbakalavrlar) 9–15 sentyabr (saat 18:00-dək), orta ixtisas təhsili müəssisələrinə qəbul olunanlar isə 9–17 sentyabr (saat 18:00-dək) tarixlərində portal.edu.az üzərindən qeydiyyatdan keçməlidirlər. Müəyyən olunmuş vaxtda qeydiyyatdan keçməyənlər qəbuldan imtina etmiş hesab olunacaq.

Orta ixtisas təhsili müəssisələrinin boş qalan yerlərinə ixtisas seçiminin tarixləri qeydiyyat prosesi bitdikdən sonra açıqlanacaq.