https://innews.az/uploads/news/2025-09/_innews_f1c5260bb7d069c7acf484588_o.jpg
Azərbaycanda küçələrin təhlükəsizliyi üçün yeni rəqəmsal platforma istifadəyə verilib.
"innews media" xəbər verir ki, trass.me Azərbaycanda küçələrin təhlükəsizliyi və qadınların sosial mühitdə üzləşdiyi problemlərin həllinə töhfə verən yeni rəqəmsal məhsul təqdim olunub.
Safe Routes komandası tərəfindən “trass.me” adı ilə ərsəyə gətirilən layihə, Azərbaycan Gənclər Fondunun Rəqəmsal Qrant müsabiqəsi çərçivəsində hazırlanıb. Layihənin rəhbərlərindən biri olan Rashad Umbayev bildirir ki, trass.me platformasının əsas məqsədi ilkin dövrdə Bakıda və Bakıətrafı ərazilərdə qadınların küçələrdə üzləşdiyi cinsi qısnama, izlənilmə, sataşma və bunun kimi digər zorakılıq hallarının qarşısının alınmasına töhfə verməkdir. Platforma istifadəçilərin real vaxtda insidentləri raport etməsi əsasında süni intellekt texnologiyası ilə ən təhlükəsiz marşrutu müəyyənləşdirməyi hədəfləyir.
Platforma həmçinin gələcəkdə toplanmış şikayət məlumatlarını müvafiq dövlət qurumları ilə paylaşılaraq problemin həlli üçün əlavə əməkdaşlıq imkanları üzərində işləyir. Layihə çərçivəsində moderatorlar qadınların küçədə qarşılaşa biləcəyi hallara qarşı mübarizə yolları haqqında maarifləndirici bloq yazıları hazırlayır. Eyni zamanda əməkdaşlıq edilən psixoloqlar zorakılıq və cinsi qısnamaya məruz qalan fərdlərə post-travmatik dəstək göstərirlər. Komanda həmçinin fərqindəliyin artırılması istiqamətində beynəlxalq tərəfdaşlarla əməkdaşlıq edir. Bu çərçivədə daha əvvəldən hazırlanmış “Evə Dönüş” adlı qısa film platformadan izləyicilərə təqdim olunub və istifadəçilərə problemin mənəvi yükünün hansı miqyasda olduğu göstərilib. Layihənin adı da xüsusi məna daşıyır. “Trass” sözü həm ingilis dilində “trust me” ifadəsinə yaxın mənanı oyadır ki bu da dilimizə güvən mənə kimi tərcümə olunur, eyni zamanda bu söz Azərbaycan dilindəki “yol” anlayışı ilə assosiasiya olunur. Bu da istifadəçilərdə platformaya güvən hissini möhkəmləndirməyi hədəfləyir.
Qeyd edək ki, layihə və onun imkanları haqqında daha ətraflı məlumatla www.trass.me saytında tanış olmaq mümkündür.
