https://innews.az/uploads/news/2025-11/_innews_5374a8e61e859eef31c4f0ac4_o.jpg
Noyabrın 14-də Azərbaycan Dövlət Pedaqoji Universiteti (ADPU) və Samux Rayon İcra Hakimiyyətinin təşkilatçılığı ilə Azərbaycan Respublikasının Konstitusiyanın 30 illiyi və "Konstitusiya və Suverenlik İli" çərçivəsində Samux rayonunun təhsil ictimaiyyəti ilə görüş keçirilib.
Samux rayon Heydər Əliyev Mərkəzində təşkil olunan görüşdə ADPU-nun rektoru professor Cəfər Cəfərov, Samux Rayon İcra Hakimiyyətinin başçısı Firdovsi Əliyev, ADPU-nun sosial və humanitar məsələlər üzrə prorektoru professor Fikrət Rzayev və rayonun 150 nəfərədək təhsil işçisi iştirak ediblər.
Əvvəlcə Ulu Öndər Heydər Əliyevin rayonda ucaldılmış abidəsi önünə gül dəstələri qoyulub, Heydər Əliyev Muzeyində Ümummilli Liderin zəngin dövlətçilik irsini əks etdirən eksponatlar və sənədlərə baxış keçirilib.
Giriş sözü ilə çıxış edən Samux Rayon İcra Hakimiyyətinin başçısı Firdovsi Əliyev qonaqları salamlayıb və 1995-ci ildə ümumxalq səsverməsi ilə qəbul olunan milli konstitusiyamızın hüquqi dövlət quruculuğunun, suverenliyimizin və əbədi zəfərlərimizin əsasını təşkil etdiyini diqqətə çatdırıb.
İcra başçısı belə əlamətdar bir gündə ölkənin aparıcı ali məktəblərindən olan, müəllimlik məbədi Pedaqoji Universitetin rəhbərliyinin rayon ictimaiyyətinin görüşünə gəlməsinin önəmini qeyd edərək, müəllimlərin cəmiyyətimizin inkişafının əsasını təşkil etdiyini vurğulayıb.
Çıxış edən ADPU-nun rektoru professor Cəfər Cəfərov dövrün reallıqlarına uyğun olaraq Pedaqoji Universitet tərəfindən müəllim hazırlığı işində sistemli və ardıcıl islahatlar apardığını, ölkə rəhbərliyinin diqqəti və görülən işlər sayəsində son illərdə müəllimlik ixtisaslarına marağın sürətlə artdığını, dövlət sifarişi üzrə keçid ballarının bir çox ixtisaslarda 500 balın üzərində formalaşdığını qeyd edib.
Rektor vurğulayıb ki, Pedaqoji Universitet hazırda orta məktəblərdə fəaliyyət göstərən müəllimlərin peşəkarlıq səviyyələrinin daimi artırılmasına, onlara medotik dəstək verilməsinə daim hazırdır və bu istiqamətdə belə ictimai görüşlərin təşkilinə daim açıqdır.
Sonra ADPU-nun sosial və humanitar məsələlər üzrə prorektoru professor Fikrət Rzayev ölkəmizin ərazi bütövlüyü və suverenliyinin qorunmasında, Azərbaycan Respublikasının Konstitusiyasından irəli gələn hüquq və vəzifələrin gənclərə aşılanmasında müəllimlərin rolu ilə bağlı məruzə edib. Məruzədə bu gün artıq 5 illiyini qeyd etdiyimiz, Ali Baş Komandan cənab İlham Əliyevin rəhbərliyi ilə şanlı Zəfər qazandığımız Vətən müharəsində müəllimlərin həm vətənpərvər milli gəncliyin tərbiyəsi, həm də canlı nümunə olaraq döyüşlərdə iştirak baxımından müstəsna xidmətlərini dilə gətirib. Bununla bağlı Azərbaycan Respublikasının Prezidenti İlham Əliyevin səsləndirdiyi fikirləri yada salıb.
Rayon müəllimlərinin çıxışlarından sonra Pedaqoji Universitetin rəhbərliyi adından universitetin məzunu olan və tədris fəaliyyətində xüsusi uğurları ilə rayonda seçilən bir qrup məktəb direktoru və müəllimlərə təşəkkürnamələr təqdim olunub.
Görüşdən sonra Heydər Əliyev Fondu tərəfindən yeni inşa olunan və cari ilin oktyabr ayında istifadəyə verilən Samux rayonu M.F.Axundov adına Alıuşağı kənd tam orta məktəbi ziyarət olunub. Məlumat üçün bildirək ki, yeni məktəb binasının inşasına ehtiyac olması ilə bağlı Heydər Əliyev Fondu tərəfindən 2024-cü ildə Alıuşağı kəndində üçmərtəbəli, 4 korpusdan ibarət yeni məktəb binasının inşasına başlanılıb. Burada, sinif otaqları, fizika, kimya, biologiya laboratoriyaları, informatika, STEAM mərkəzi, hərbi təlim, tibb, əmək təlimi otaqları, eləcə də məktəbəqədər sinif otağı, kitabxana, yeməkxana, akt və idman zalları qurulub, məktəbin ərazisində açıq idman meydançası yaradılıb.
