https://innews.az/uploads/news/2025-11/_innews_fe14599dbb8a9983aa6192a9e_o.jpg
Noyabrın 25-də Dini Qurumlarla İş üzrə Dövlət Komitəsinin (DQİDK) təşkilatçılığı ilə “Vətən müharibəsindəki qələbəmizdə xalqımızın milli-mənəvi dəyərlərinin rolu” mövzusunda konfrans keçirilib.
Tədbir Azərbaycan Respublikasının Dövlət Himninin səsləndirilməsi, Ümummilli Lider Heydər Əliyev və şəhidlərin əziz xatirəsinin bir dəqiqəlik sükutla yad edilməsi ilə başlanıb.
Tədbiri giriş sözü ilə açan Dövlət Komitəsinin Mil-Muğan regional bölməsinin müdiri vəzifəsini icra edən Cavanşir Bəhrəmov bildirib ki, Ulu Öndər Heydər Əliyevin başlatdığı siyasi kursun Prezident İlham Əliyev tərəfindən uğurla davam etdirilməsi nəticəsində rəşadətli Ordumuz Müzəffər Ali Baş Komandanın rəhbərliyi altında torpaqlarımızı düşmən tapdağından azad edib. C.Bəhrəmov qeyd edib ki, tariximizin parlaq və unudulmaz səhifələrindən birini təşkil edən 44 günlük müharibədə qazandığımız qələbənin əsasında dövlət başçısının uzaqgörən və praqmatik siyasəti dayanır.
Sabirabad Rayon İcra Hakimiyyəti başçısının birinci müavini Həsən Həsənov vurğulayıb ki, xalqımız həmişə dövlətçiliyimizi, milli birliyimizi, milli ruhumuzu, vətənpərvərlik hisslərimizi qoruyub saxlamağı bacarıb. H.Həsənovun sözlərinə görə, Vətən müharibəsi zamanı xalqımızın hər an dövlətin və Ordunun yanında olması və dəstəkləməsi uzun illərdir Azərbaycanda milli-mənəvi dəyərlərin qorunması istiqamətində həyata keçirilən uğurlu siyasətin nəticəsi idi.
Daha sonra çıxış edən DQİDK-nın Regionlarla iş şöbəsinin müdir müavini Ruslan Əsgərov diqqətə çatdırıb ki, Azərbaycan xalqının Vətən müharibəsində əldə etdiyi zəfər təkcə hərbi, iqtisadi üstünlük hesabına olmayıb, burada milli-mənəvi dəyərlərimiz də xüsusi rol oynayıb. 44 günlük müharibədə müxtəlif dini inanclara mənsub ölkə vətəndaşları Ali Baş Komandanımızın ətrafında dəmir yumruq kimi birləşmişdilər. Qələbəyə aparan 30 illik yolun şərəf səhifəsi kimi tariximizə yazıldığını vurğulayan R.Əsgərov bildirib ki, bu yol həm də millətimizin ləyaqətinin, həmrəyliyinin və iradəsinin təcəssümüdür.
QMİ-nin səlahiyyyətli nümayəndəsi Ağakərim Sadıqov, Regional Mədəniyyət İdarəsinin rəisi Nadir Quliyev, Regional Gənclər və İdman İdarəsinin sektor müdiri Murad Həsənli, Azərbaycan Vətən Müharibəsi Veteranları İctimai Birliyinin Sabirabad rayon şöbəsinin sədri Faiq Hüseynov və “Sabirabad Gənclər Evi” sosial xidmət müəssisəsinin direktoru Rəşad Qurbanov çıxışlarında Vətən müharibəsindəki Zəfərdə xalqımızın milli-mənəvi dəyərlərinin rolundan bəhs ediblər.
Qeyd edək ki, tədbirdə şəhid ailələrinin üzvləri, Vətən müharibəsi iştirakçıları, din xadimləri ziyalıları və gənclər iştirak ediblər.
