https://innews.az/uploads/news/2025-11/_innews_4e24a186eef6980f119a4732e_o.jpg
Noyabrın 26-da Dini Qurumlarla İş üzrə Dövlət Komitəsinin təşkilatçılığı ilə Şirvan şəhərində “Şanlı Zəfər – tariximiz, qürurumuz” mövzusunda konfrans keçirilib.
Tədbir Azərbaycan Respublikasının Dövlət Himninin səsləndirilməsi, Ümummilli Lider Heydər Əliyev və şəhidlərin əziz xatirəsinin bir dəqiqəlik sükutla yad edilməsi ilə başlanıb.
Tədbiri giriş sözü ilə açan Şirvan Şəhər İcra Hakimiyyəti başçısının müavini Məharət Mustafayev çıxışında qeyd edib ki, rəşadətli Ordumuzun əldə etdiyi tarixi zəfər xalqımızın birliyinin və qəhrəmanlığının nümunəsidir. Bu qələbə yalnız hərbi uğur deyil, eyni zamanda dövlətimizin gücünü və milli qürurumuzu əks etdirir. Natiq diqqətə çatdırıb ki, şəhidlərimizin qanı ilə yazılmış bu tarix gələcək nəsillərə qürur, əzmkarlıq və vətənpərvərlik dərsidir.
Dövlət Komitəsinin Dini məsələlər üzrə şöbəsinin Analitik təhlil və proqnozlaşdırma sektorunun müdiri Cəmaləddin Quliyev vurğulayıb ki, Zəfər Günü xalqımızın 30 illik həsrətinə son qoyan, əzəli torpaqlarımızın azadlığı uğrunda aparılan Vətən müharibəsində qazanılmış möhtəşəm qələbəni simvolizə edir. Müzəffər Ali Baş Komandan, Azərbaycan Respublikasının Prezidenti cənab İlham Əliyevin rəhbərliyi ilə qazanılmış zəfər tariximizə qızıl hərflərlə yazılıb. O, respublikamızda yaşayan bütün xalqların nümayəndələrinin “Dəmir yumruq” ətrafında birləşərək həmrəylik nümayiş etdirdiyini qeyd edib.
Dövlət Komitəsinin Şirvan-Salyan regional bölməsinin müdiri Sənan Xəlilov bildirib ki, 8 Noyabr - Zəfər Günü Azərbaycan dövlətçiliyinin tarixində yeni bir dövrün, “Qarabağ Azərbaycandır!” çağırışının rəmzi oldu. O vurğulayıb ki, Azərbaycan xalqının 44 günlük müharibədə əldə etdiyi qələbə bir daha sübut etdi ki, güclü dövlət yalnız güclü liderin rəhbərliyi altında formalaşa bilər.
YAP Şirvan şəhər təşkilatının sədri Zahir Qəhrəmanov, Şirvan şəhər Ağsaqqallar Şurasının sədri Fəxrəddin Rəhimov, şəhid atası Alim Zülfüqarov, Qafqaz Müsəlmanları İdarəsinin Şirvan şəhəri üzrə səlahiyyətli nümayəndəsi Əvəz Mehrəliyev və Neftçala şəhəri “Sahib Əzzaman” məscidinin qadın dini ayinlərinin icraçısı Elmira Abbasova çıxışlarında vurğulayıblar ki, Zəfər Günü gənclər üçün şanlı tarix olmaqla yanaşı, həm də vətənə sevgi, sadiqlik və fədakarlıq nümunəsidir.
Qeyd edək ki, tədbirdə dövlət orqanlarının əməkdaşları, şəhid ailəsi üzvləri, müharibə iştirakçıları, din xadimləri, gənclər və ictimaiyyət nümayəndələri iştirak ediblər.
