https://innews.az/uploads/news/2025-12/_innews_30c811b9e18203c29391df08a_o.jpg
Turan Dövlətləri Birləşmiş Konfederasiyasının (TURKKON) nümayəndə heyəti Azərbaycana səfəri çərçivəsində Türk dünyasının strateji əməkdaşlığı, iqtisadi inteqrasiyası, mədəni irsinin təbliği və akademik əlaqələrinin genişləndirilməsi istiqamətində silsilə görüşlər keçirib.
Bu barədə AZƏRTAC-a açıqlamasında Turan Dövlətləri Birləşmiş Konfederasiyasının xarici təşkilatlarla əlaqələr üzrə məsul şəxsi Mesut Gülaçtı bildirib. Mesut Gülaçtı bildirib ki, səfərin məqsədi türk dövlətləri arasında təhsil, elm, iqtisadiyyat və mədəniyyət sahələrində əməkdaşlığı dərinləşdirmək, “Made in Turan” brendi altında yeni inteqrasiya mexanizmləri formalaşdırmaq, habelə Turan coğrafiyasına qlobal miqyasda nəzərə çarpanlığını artırmaqdır.
TURKKON nümayəndə heyəti Azərbaycanın dünyaşöhrətli rəssamı Sakit Məmmədovun şəxsi qalereyasını ziyarət edib. Söhbət zamanı Türk dünyası sənətçilərinin beynəlxalq səviyyədə tanıdılması, birgə sərgi layihələri və mədəni diplomatiyanın gücləndirilməsi istiqamətləri müzakirə olunub. Qonaqlara rəssamın əsərlərindən ibarət xüsusi nəşrlər təqdim olunub.
Həmçinin nümayəndə heyətinin Bakıda KOBİ Evi çərçivəsində Azərbaycan Franşayzinq Birliyinin rəhbəri Camid Mövsümovla görüşündə türk dövlətləri arasında ticarət əlaqələrinin genişləndirilməsi, KOBİ-lərin ixrac potensialının artırılması və “Made in Turan” konsepsiyası əsasında vahid iqtisadi əməkdaşlıq modelinin yaradılması müzakirə olunub. Tərəflər yaxın dövrdə Turan iqtisadi inteqrasiyasına dair yol xəritəsinin hazırlanması barədə razılığa gəliblər.
Səfər çərçivəsində TURKKON nümayəndə heyəti Azərbaycan Milli Elmlər Akademiyasının Dilçilik İnstitutunun rəhbərliyi və aparıcı alimlər ilə bir araya gəlib. Görüşdə türk dilləri arasında terminologiyanın birləşdirilməsi, ortaq dil korpuslarının hazırlanması, dil texnologiyaları və süni intellektəsaslı layihələrin inkişafı istiqamətində əməkdaşlıq imkanları müzakirə olunub.
Mesut Gülaçtı vurğulayıb ki, dil Türk dünyasının mədəni yaddaşı və inteqrasiyasının əsas sütunudur:
“300 milyon insanın danışdığı türk dili Turan coğrafiyasının gələcəyini müəyyən edən ən güclü birləşdirici elementdir. TURKKON olaraq mədəni və akademik inteqrasiyanın gücləndirilməsinə xüsusi önəm veririk”.
Nümayəndə heyətinin Azərbaycandakı görüşlərinin Türk dünyasında institusional həmrəylik, iqtisadi inteqrasiya və mədəni əməkdaşlığa yeni dinamizm qatacağı gözlənilir.
