https://innews.az/uploads/news/2025-12/_innews_c89417ccc0b92942e3c3c820e_o.jpg
Dekabrın 2-də Azərbaycan Dövlət Pedaqoji Universitetində (ADPU) Filologiya fakültəsi və fakültənin nəzdində fəaliyyət göstərən Meh ədəbi dərnəyinin təşkilatçılığı ilə görkəmli Azərbaycan ədibi, Xalq şairi Bəxtiyar Vahabzadənin anadan olmasının 100 illiyinə həsr olunmuş “Sözün zirvəsi – Bəxtiyar Vahabzadə 100” adlı ədəbi-bədii tədbir keçirilib. Tədbirdə ADPU-nun elm və innovasiyalar üzrə prorektoru professor Asəf Zamanov, sosial və humanitar məsələlər üzrə prorektoru professor Fikrət Rzayev, Filologiya fakütəsinin dekanı dosent Könül Həsənova, professor-müəllim heyəti və tələbələr iştirak ediblər.
Ümummilli Lider Heydər Əliyevin və vətənin ərazi bütövlüyü uğrunda canlarından keçən şəhidlərimizin ruhununun yad edilməsi ilə başlanan tədbirdə əvvəlcə Bəxtiyar Vahabzadənin həyat və yaradıcılığını əks etdirən videoçarx nümayiş olunub.
Tədbirdə şairin əsərləri əsasında Meh ədəbi dərnəyinin üzvü olan tələbələr tərəfindən hazırlanmış müxtəlif kompozisiyalar nümayiş etdirilib. Şairin müəllifi olduğu “Yaman darıxmışam “,“Şair vətən”, “Bir salama dəymədi”, “Yaşdan gileyliyəm” şeirləri, “Gülüstan poeması” və müxtəlif şeirlərdən ibarət səhnəciklər tələbələrin təqdimatında böyük maraqla qarşılanıb.
Daha sonra Filologiya fakültəsinin tələbəsi Südabə Vəliyeva şairin sözlərinə yazılmış “Bu ayrılıq nədən oldu?", 279 nömrəli tam orta məktəbin şagirdi Ayxan İsgəndərli isə “Azərbaycan”mahnısını səsləndirib, eləcə də “Köçür durna qatarı” mahnısına qurulmuş rəqs kompozisiyası nümayiş olunub.
Çıxış edən Meh ədəbi dərnəyinin rəhbəri Firuz Yusibov Azərbaycan ədəbiyyatının görkəmli nümayəndələrinin yaradıcılığının tələbələr arasında sistemli şəkildə təbliğinin, ədəbi-bədii gecələr, müzakirələr və təqdimatların təşkilininin dərnəyin əsas vəzifələrindən olduğunu qeyd edib və təşəbbüsün dəstəklənməsi və tədbirin təşkilinə göstərilən dəstəyə görə fakültə rəhbərliyinə minnətdarlığını bildirib. F.Yusibov B.Vahabzadənin dərnək üzvləri tərəfindən çəkilmiş portretini fakültə dekanı dos. Könül Həsənovaya hədiyyə edib.
Sonda çıxış edən Filologiya fakültəsinin dekanı dos. Könül Həsənova vurğulayıb ki, Bəxtiyar Vahabzadə yaradıcılığı Azərbaycan poeziyasında milli kimlik, ana dilinə sevgi və vətənpərvərlik ideyalarının formalaşmasında mühüm yer tutur və dahi şairin xatirəsi daim Azərbaycan xalqının yaddaşında yaşayır.
Bu cür tədbirlərin tələbələrdə milli yaddaşın formalaşmasına, bədii-estetik zövqün inkişafına və ana dilinə sevginin aşılanmasına mühüm töhfə verdiyini bildirən dekan dos. K.Həsənova tədbirin təşkilinə görə Meh ədəbi birliyinə və iştirakçı tələbələrə təşəkkürlərini çatdırıb və tədbirin təşkilində fəal iştirak edən tələbələri təşəkkürnamə ilə təltif edib.
