https://innews.az/uploads/news/2025-12/_innews_a7806481d4d0a3d7cecf3170c_o.jpg
“Cinex” kinokompaniyası 12 noyabr 2025-ci ildə həyatı faciəvi şəkildə yarımçıq qalan həmtəsisçisi Emin İbrahimovun xatirəsini anır və onun həyat və fəaliyyət yoluna qısa nəzər salır.
Bakı şəhərindəki 27 saylı orta məktəbi bitirdikdən sonra Emin İbrahimov ali təhsilini Brüsseldə almış, United Business Institutes-da biznesin idarə olunması ixtisası üzrə bakalavr, Brussels Free University-də isə magistr dərəcəsi qazanmışdır. O, korporativ maliyyə sahəsində ixtisaslaşaraq geniş peşəkar bilik və təcrübə formalaşdırmışdır.
Peşəkar fəaliyyətinə Azərbaycan Respublikası Prezidentinin yanında Dövlət Qiymətli Kağızlar Komitəsində başlayan Emin İbrahimov daha sonra Azərbaycan Beynəlxalq Bankında və BP Azerbaijan şirkətində çalışmışdır. O, “Asan İmza” mobil elektron imza operatoru olan “Best Solutions” şirkətinin həmtəsisçilərindən biri olmuşdur. 2010-cu ildə həyat yoldaşı Mariya İbrahimova ilə birlikdə “Cinex” kinokompaniyasını təsis etmişdir.
Emin İbrahimovun rəhbərliyi dövründə “Cinex” reklam çarxları, musiqi klipləri, sənədli, qısametrajlı və tammetrajlı filmlərin istehsalı üzrə ölkənin aparıcı kinokompaniyalarından birinə çevrilmişdir. Şirkət Discovery Channel, NBC, National Geographic və digər nüfuzlu beynəlxalq qurumlarla əməkdaşlıq çərçivəsində bir sıra iri televiziya layihələri həyata keçirmişdir. “Baku-2015” layihəsi çərçivəsində International Sports Broadcasting ilə bağlanan müqavilə əsasında on qısametrajlı və bir 70 dəqiqəlik “Bakıya aparan yol” adlı sənədli film istehsal olunmuşdur.
Eminin bədii kinoda prodüser kimi debütü Nar Mobile-in dəstəyi ilə İçərişəhər sifarişi əsasında hazırlanmış filmlər silsiləsi olmuşdur. Layihə gənc rejissorların karyerasında ilk addım olan üç qısametrajlı filmdən ibarət idi. Onlardan ikisi — rejissor Mariya İbrahimovanın “Allaha məktub” və rejissor Teymur Hacıyevin “Yara” filmləri — 40-dan çox beynəlxalq kinofestivalda seçilmiş və bir sıra mükafatlara layiq görülmüşdür. O, həmçinin “Mən uçmaq istəyirəm” adlı sənədli filmin prodüseri olmuş, prodüser Aleksandr Rodnyanski ilə birlikdə “Balıqçının qızı” tammetrajlı filmi üzərində çalışmışdır. Son iri layihəsi Elvin Adıgözəlin “Mənim sehrli dünyam” filmi olmuşdur.
Son illərdə Emin İbrahimov operator sənətinə də maraq göstərmiş, Çin və Portuqaliyada peşəkar kurs və ustad dərslərində iştirak etmişdir. Onun operator kimi ilk işi Lala Əliyeva-Klıçkovanın “Belə şirin həyat” filmi olmuş, daha sonra isə İmam Həsənovun “Xəyalpərəstlər” sənədli filminin çəkilişlərində iştirak etmişdir. Filmin premyerası Böyük Britaniyada keçirilən Sheffield Doc/Fest festivalında baş tutmuşdur.
Uzun müddət “Cinex” “Euronews” telekanalının Azərbaycandakı rəsmi nümayəndəsi kimi fəaliyyət göstərmişdir. Emin İbrahimov 44 günlük Vətən müharibəsi zamanı “Euronews”un xüsusi müxbiri olaraq döyüş bölgəsində çalışmışdır. Suqovuşan istiqamətində çəkiliş zamanı baş vermiş raket hücumu ilə bağlı reportaj geniş ictimai rezonans doğurmuşdur. Azərbaycan Respublikası Prezidentinin sərəncamı ilə Emin İbrahimov “Tərəqqi” medalı ilə təltif edilmişdir.
Emin İbrahimov biznes, media və kino sahələrində uğurla fəaliyyət göstərən, prosesləri idarə etməyi və yaradıcı komandalar formalaşdırmağı bacaran peşəkar kimi yadda qalmışdır. Onun Azərbaycanın müasir kino və media mühitinin inkişafındakı rolu əhəmiyyətli olmuşdur.
Emin İbrahimovdan iki övladı qalıb — 19 yaşlı Rena və 9 yaşlı Mikayıl.
